Mittarfinnut ingerlatseqatigiiffimmi ileqqoreqqusat allanngortinneqassapput

Kalaallit Airports A/S-imi immikkut ittumik ataatsimeersuartitsiniarlutik Naalakkersuisut aalajangiuppaat, tassani ingerlatseqatigiiffiup ileqqoreqqusaani "naleqqussaasoqassaaq".

Mittarfiliornissamut ingerlatseqatigiiffiup Kalaallit Airportsip kingullermik immikkut ittumik ataatsimiinnerata akerlianik, isertuussilluni siulersuisunut siulittaasup akissarsiaanik qaffaasoqarnerani, ileqqoreqqusat naleqqussarneqarnissaannut aalajangiinermi Naalakkersuisut maanna ammasumik nittartakkaminni nalunaaruteqarput.

Naalakkersuisut februaarip 14-anni ataatsimiinnerannit imaqarniliami atuarneqarsinnaavoq, Naalakkersuisut siulittaasuata naalakkersuisoqarfiani siulersuisut allattoqarfiani immikkoortortami pisortaq Lars Balslev isummernissamut tunngavissiaq manna naapertorlugu ataatsimeersuarnerup ingerlanneqarnissaanut pisariaqartunik suliaqarnissaanut piginnaatinneqassasoq.

Oqaasertaa

Ileqqoreqqusat allanngornissaat imaqarniliami ima oqaasertalerneqarpoq:

” Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaata nr. 4, 22. november 2018-imeersup akuersissutigineqarnera tunngavigalugu ingerlatseqatigiiffiup ileqqoreqqusaani naleqqussaasoqassasoq, soorlu tamanna immikkoortumi tullinnguuttumi inassutigineqartoq”.

Ileqqoreqqusani naleqqussaanissap sumut tunnganerani itisiliititsinissaq, Sermitsiaq.AG suli iluatsinngilaa.

Powered by Labrador CMS