Akissarsiat qaffanneqarneri taamaammat saqqummiunneqanngillat
Naalakkersuisut aalajagingaat pillugit piffissap ilaani avammut saqqummiussisoqarneq ajorpoq. Tamanna naalakkersuisuusimasumit inuiaqatigiinnillu ilisimatusartumit isornartorsiorneqarpoq.
Naalakkersuisut ataatsimiinnerminni aalajagingaqarsimappata, nalinginnaasumik ataatsimiinnerup imaqarniliaa saqqummiunneqartarpoq. Ataatsimiinnernit imaqarniliat Naalakkersuisut nittartagaanni saqqummiunneqartarput.
Sulinngiffeqarnerulli nalaani, Naalakkersuisutullu siulittaasuungallartutut inissisimasoqarnerata nalaani avammut saqqummiussassanik imaqarniliortoqartanngilaq.
Avammut nalunaarneq kingusissoq
Kalaallit Airportsimi siulersuisut siulittaasuata akissarsiaanik immikkut ittumik qaffaanerup kingorna ukiup affaa qaangiutereertorlu avammut saqqummiunneqarneranut, tamanna nassuiaatigineqarpoq. Mittarfiliuteqatigiiffiup immikkut ittumik ataatsimeersuarnerani, juulip 25-ani akissarsiat 500.000 koruuniniit 750.000 koruuninut qaffanneqarput. Akissarsiaritinneqartut Namminersorlutik Oqartussat suliffeqarfiutaanni aatsaat taama annertutigipput.
Aalajangernerup saqqummiunneqarneranut, innuttaasullu oqallinnissaanut periarfissaqalerneranut pissutaavoq Pele Brobergip, Partii Naleraq, Naalakkersuisut paragraf 37 atorlugu arlalinnik apeqquteqarfigigamigit.
Ukiuni arlalinni ileqqoq
- Suliaq juulip qaammataani suliarineqarpoq, ileqqut ukiuni arlalinni atoreersut malillugit naalakkersuisutut siulittaasuugallartututut sulinngiffiup nalaani Naalakkersuisut aalajangiisinnaasarput, Naalakkersuisut Siulittaasoqarfiani pisortaq Søren Hald Møller, Sermitsiaq.AG-mut ilisimatitsivoq.
- Siulittaasutut aalangerneqartut, piffissami allami aalajangerneqartut allat assiginagit, ataatsimiinnermi imaqarnilianut ilanngunneqartanngillat, Søren Hald Møller erseqqissaavoq. Ataatsimiinnermit imaqarniliat una malillugu Naalakkersuisut nittartagaanni takuneqarsinnaapput.
Tatigeqatigiinneq
- Ukiup ingerlanerani siulittaasutut aalajangiisoqartarpoq, soorlu sulinngiffeqarnerup sapaassuillu nalaani, Inatsisartunilu ataatsimiinnerup nalaani. Taakku nittartakkatsinni “imaqarnilianut” ikkunneqarneq ajorput. Naalakkersuisulli akornanni nassiussuunneqartarlutik, naalakkersuisoqarfimmi pisortaq ilisimatitsivoq, erseqqissarlugulu Naalakkersuisut ataatsimiittarnerat, taamatullu ataatsimiinnermi suliat ataqqeqatigiinnermit tunngaveqartut.
Namminersorlutik Oqartussat suliffeqarfiutaat ataatsimeersuaraangata – nalinginnaasumik imaluunniit immikkut ittumik – paasissutissat ataatsimiinnermi imaqarnilianiittarput. Assersuutigalugu Air Greenlandimi ataatsimeersuarneq aamma Great Greenlandimi immikkut ittumik ataatsimeersuarneq juunip 14-ani ataatsimiinnermit imaqarniliami ilanngunneqarsimapput.
Tamat oqartussaaneranni ajornartorsiut
Pele Broberg, aasakkut 2018-imi Aningaasaqarnermut Naalakkersuisuusoq, naalakkersuisoqarfiup pisortaata nassuiaataanut tupaallappoq.
- Naalakkersuisuunitta nalaani sulinngiffeqarneq ajorpugut. Politikkikkut suliap isertuunneqarnera ajorpoq, tamallu oqartussaaneranni ajornartorsiutaalluni, Partii Naleqqami politikereq oqarpoq.
Ilisimatusarfimmi inuiaqatigiilerisup, Birger Poppelip, tamanna aamma eqqarsarnartoqartippaa.
Ilisimatusartoq: Eqqarsarnartoqangaatsiarpoq
- Aalajagingassat avammut saqqummiunneqarusunngitsut piffissanut, Naalakkersuisut ataatsimoorfigisinnaanngisaannut, inissinneqarsinnaanerat eqqarsaammernarpoq, Birger Poppel Sermitsiaq.AG-mut erseqqissaavoq.