Silaannakkut angallanneq: Savalimmiut KLM-imik suleqateqalerput
Savalimmiut timmisartuutileqatigiiffiat Atlantic Airways nunarsuarmi timmisartuutileqatigiiffiit annerit ilaannik KLM-imik suleqateqarnissamut isumaqatigiissusiorpoq.
Isumaqatigiissut CodeSharemik taaneqartartoq isumaqatigiissutigineqarpoq, tamanna isumaqarpoq, KLM-ip angallassisarnermi saniatigut Atlantic Airwaysip angalasarfii arlallit KLM-itut normoqalersinneqartut.
Nunarsuarmi angalasorpassuit taamaasillutik KLM ilaaffigalugu Savalimmiunukarsinnaalerput, isumaqatigiissillu atorlugu KLM aqqutigalugu sumiiffiit 165-it assigalugit toqqaannartumik Savalimmiunukartoqarsinnaalerluni. Atlantic Airways tusagassiutinut taama nalunaaruteqarpoq.
- Ullumikkut nuannaarpugut, isumaqatigiissummi una tikitserlugu sivisuumik sulisimavugut. Atlantic Airways Savalimmiut nunarsuup sinneranut atanerulertissallugu suli sulissaaq, isumaqatigiissullu una ajunngitsumut alloriarneruvoq, Jóhanna á Bergi, Atlantic Airwaysimi pisortaq, oqarpoq.
Eqaannerusoq
Jóhanna á Bergi AirFrance KLM-imilu Danmarkimi Islandimilu pisortaq, Anita Wagner Feddersen isumaqatigiissummik atsiortuupput, taanna januaarip 24-ani ukioq manna atuutilissaaq.
- Atlantic Airwaysimut suleqatigiinnerput annertusigatsigu nuannaarpugut, avannarlernullu attaveqarnerput taamaasilluta nukittorsarlugu.Isumaqatigiissutip ilaasugut eqaannerusumik angallassinnaalissavai, Anita Wagner Feddersen oqarpoq.
Mittarfik ulapaarfiusoq
Angallattut amerliartoruusaarsimapput, tamassumunngalu pissutaaqataasut ilagaat SAS Savalimmiunut angalatitsisalersimammat.Savalimmiuni mittarfimmi, Vága Lufthavnimi, aatsaat taama ulapaarfiutigivoq. 2018-imi timmisartoqarfik aqqutigalugu angallattut aatsaat taama amerlatigaat. Inuit 377.813-it mittarfik aqqusaarlugu angalapput, 2017-imillu angallattut sanilliukkaanni, 11 procentpointimik amerleriarsimapput.
Angallattut amerliartoruusaarsimapput, tamassumunngalu pissutaaqataasut ilagaat SAS Savalimmiunut angalatitsisalersimammat.
Maanna apeqqutaaginnalerpoq Atlantic Airways KLM-ilu isumaqatigiissusiormata, angalasartut suli amerlanerulissanersut. Isumaqatigiissutip saniatigut Atlantic Airways Parisimut toqqaannartumik angalatitsisalerpoq, New Yorkimullu angalatitsisalernissamut akuersissutinik utaqqiinnarluni.