Forstanderi: Savimmilerinermik Ilinniarfiup Sisimiunut nuunneqarnissaa iluaqutitaqarpoq
Nuummi Savimmilerinermut Ilinniarfiup Sisimiunut nuunneqarsinnaanera arlalitsigut iluaqutitaqassasoq ilinniarfimmi forstanderip oqaatigaa
Nuummi Savimmilerinermik Ilinniarfiup Sisimiunut nuunneqarnissaanut Naalakkersuisut 20 million koruuninik pilersaarusiornissamut aningaasaliissuteqarput. Ilinniarfiup nuunneqarnissaa oqallisaangaatsiareerpoq.
Kalaallit Nunaanni Teknikimik Ilinniarfimmi forstanderi Jokum Møller oqarpoq, Nuummit Sisimiunut nuunneqarnissaa arlalitsigut iluaqutitaqassasoq.
- KTI assigiinngitsorpassuarnik ilinniarfiusinnaasunik neqerooruteqartarpoq. Ilinniarnermi atortut ilinniartitsisullu assigiinngitsutigut atorluarneqarsinnaasarput. Tamarmik ataatsimuulernissaat iluaqutaaginnassaaq, Jokum Møller oqarpoq.
Ilinniarfimmut iluaqutissat assigiinngitsut
Nuummi Savimmilerinermik Ilinniarfik 35-nik sulisoqarpoq, taakkunani 20-it missaaniittut ilinniartitsisuullutik. Jokum Møller ilisimatitsivoq, ilinniartitsisut arlaqartut Sisimiunut nuukkusunngitsut.
Sisimiuni KTI ineriartortinneqaqqittussaasoq ilisimatitsivortaaq, tassani DTU Arktisk pilersinneqartussaalluni.
- Inuusuttut ilinniarfiattut aamma Ph.d.-imut ilinniartut Sisimiuni ilinniagaqarsinnaalissapput, tamannalu ilinniarfimmut iluaqutaassaaq, tassami Ph.d.-imik ilinniagaqartut aamma ilinniartiteqataasinnaassammata, oqarpoq.
Ilumut Nuummi ilinniarfiup Sisimiunut nuunneqassanersoq suli qulakkeerneqanngilaq. Pilersaarusiornerit ingerlanneqaqqaartussaapput, taanna pereerpat paasinarsissaaq ilumut ilinniarfik ilumut nuunneqassanersoq.
Sisimiuni Savimminilerinermik Ilinniarfiup allilerneqarnissaa 139 million koruunit missaannik naleqassaaq. Tamatuma saniatigut nuunnermi aamma suliunnaarnermi ajunngitsorsiassanut aningaasartuutit tamarmiusut 4,9 million koruuniussasut. Aamma suliffiup (allaffimmi pequtit ilusilersugaaneq il.il.) nuunneqarneranut kiisalu IT -qarnermut isumaqatigiissutit, nittartakkap aamma oqarasuaatit allanngortinnerinut atatillugu aningaasartuuteqartoqassaaq. Paasissutissat Aqqaluaq B. Egedep §37 naapertorlugu apeqquteqaataani akissutigineqartuni takuneqarsinnaapput.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...