Pinngortitaleriffik aningaasanik katersilluartartoq
Misissuinissanut atatillugu Pinngortitaleriffik aningaasaliiffigineqarluartarpoq. Nunatsinnit aamma nunanit allanit aningaasaliiffigineqartarput
2013-imut sanilliullugu 2017-mi Pinngortitaleriffik marloriaammik amerlanerusunik aningaasaliiffigineqarpoq. Tassami Pinngortitaleriffik katillugit 72,4 million koruuninik 2017-mi assigiinngitsunit aningaasalaaffigineqarpoq.
Eriup akissuteqaatai
Pinngortitaleriffiup ukiumoortumik kalaallit aningaasanut inatsisaanni aningaasaliissutit 100-t tikillugit amerlassusillit aqutarisarpai, taakkulu 2019-imi 64,3 million koruuninik amerlassuseqarput. Aningaasaliissutit aningaasallu atorneqartut Pinngortitaleriffiup ukiumoortumik nalunaarusiaani allassimapput.
Taakku amerlanersaat nunatsinni nunanilu allani pisortat sullissiviinit, soorlu ministereqarfinnit, aqutsisoqarfinnit, ilisimatusarnermi siunnersuisooqatigiinnit, Nunani Avannarlerni Ministerit Siunnersuisooqatigiiffiannit, EU-mit il.il. pissarsiarineqartarput, Erik Jensen ilisimatitsivoq.
Avataaniit aningaasaliissutini siunertaasut immikkoortunut sisamanut agguarneqarsinnaapput:
Ilisimatusarnissamut aningaasaliissutit, immikkut ittumik ilisimatusarfissanut apeqqutinik paasiniaanissamut siunertaqarfiusut.
Alapernaarsuinissamut aningaasaliissutit, aningaasanut inatsimmi aningaasaliissutit naammatsinnagit Kalaallit Nunaanni uumasooqatigiinnik, silap pissusianik pinngortitallu ataqatigiinnerinik alapernaarsuinermik siunertaqarfiusut.
Akissarsiassanut aningaasaliissutit, Kalaallit Nunaanni ilisimatusarnermi piginnaaneqarfinnik annertusaanissamik siunertaqarfiusut.
Attaveqaatinut aningaasaliissutit, ilisimatusarnermi attaveqaatinik, soorlu illunik, ornigulluni misissuisarfinnik, angallatinik ilisimatusarnermilu atortunik annertusaanissamik siunertaqarfiusut.
Avataanit aningaasaliisut
Tamatumunnga atatillugu namminersortut uku tunissuteqartuupput:
- Aage V. Jensenip Aningaasaateqarfii: Illut, ornigullu misissuisarfiit atortullu.
- Oak Foundation/Villum-ip Aningaasaateqarfia: Avatangiisinut aatsitassanullu immikkoortortaqarfimmi nutaamik pilersinneqartumi piginnaaneqarfinnik annertusaaneq.
- Carlsbergip Aningaasaateqarfia: Imaani uumasut miluumasut nerisaqarnerat.
- Royal Greenland: Nipisaat amerlassutsimikkut katitigaanerinik misissuineq.
- Sustainable Fisheries Greenland: Aalisarfinni uumasut natermiut misissuiffigineqarnerinut tapiissutit.