Katsorsaaneq ingerlatiinnarumallugu Herstedvesterimiiginnarusuttut

Katsorsarneqarusunneq nunamut angerlarnissamit pingaartinneqarneruvoq. Herstedvesterimi parnaarussaaqqasut marluk oqarput, taakkumi Kalaallit Nunaannut angerlarumanngillat

Kalaallit Herstedvesterimi parnaarussaaqqasut qaammatip tulliani aalajangissavaat Kalaallit Nunaannut angerlassanerlutik.

Herstedvesterimiittut marluk aalajangiusimapput: Angerlarumanngillat.

Herstedvesterimi katsorsarneqarnertik ingerlatiinnarusuppaat, tigummineqartussatut pineqaatissinneqarsimasut marluk Sermitsiaq.AG-mut oqarput.

'Minik' sivisuumik aalajangiusimareerpoq.

Katsorsarneqarneq iluaqutaasoq

- Maani periarfissagissaarneroqaanga, Sermitsiaq.AG-mut oqarpoq.

- Herstedvesterimi sulisinnaavunga, ilinniagaqarsinnaavunga pikkorissarfigisinnaasallu arlariit tigusinnaallugit. Pingaarnerpaavorli katsorsarneqarsinnaanera.

'Minik' Herstedvesterimiippoq ukiuni sisamani. Tarnip pissusaanik ilisimasalinnik oqaloqateqartarnini iluaqutigaa, eqqissinerusimavoq ammanerulerlunilu.

- Katsorsarneqarnerma ingerlaannarnissaa kissaatigaara. Imminut suliarinera ingerlatiinnarusuppara, naqissuserpaa.

Pinerluttunik Isumaginnittoqarfik paasissutissiilluni ataatsimiisitsivoq, tassani Nuummi parnaarussivik ilaatigut sammineqarluni. Tamanna 'Minimmut' isummamik allannguinngilaq.

Jens Mikaelsen aamma Herstedvesterimiiginnarusuppoq, taassuma katsorsarneqarnini aamma ingerlatiinnarusuppaa.

- Katsorsaatit tungaatigut aamma atugarissaarnerugunarpoq maaniilluni, tassani misissuinerit ataavartuusarput. Herstedvesterimiiginnarnissara kissaatigaara, oqarpoq.

Jens Mikaelsen 2011-mi Herstedvesterimut nuunneqarpoq.

- Nalunaarfigineqaqqammerpunga katsorsaatitortinneqarnera ingerlalluaannassappat ukioq ataaseq missaa qaangiuppat parnaarussivimmut allamut nuutsinneqarsinnaallunga, tassani aninissanut piareersarneqalissallunga.

Pulaarneqarsinnaajunnaarneq

Herstedvesterimiiginnarusulluni aalajangerneq taamaattoq aamma naleqarpoq. Tassami qanigisat pulaartarnerat akilerneqartarunnaassaaq aamma Kalaallit Nunaannut peqateqarluni angalasarnerit taamaatinneqassallutik. Tamanna 'Minimmut' eqquinngilaq.

- Katsorsarneqarnera pingaarnerpaatippara, ilaqutannit pulaarneqartarninnit pingaartinneruara. Piffissanngorpat angerlarumaarpunga, oqarpoq.

Jens Mikaelsen Kalaallit Nunaaliaqqikkusunngilaq.

- Oqarsinnaavungali angerlartussat ajunngitsumik aalajangertut. Qujanaqaaq Nuummi parnaarussivittaassammat, Jens Mikaelsen oqarpoq.

'Minik' aterminik isertuussivoq, aqqa aaqqissuisoqarfimmit ilisimaneqarpoq.

Apersorneqartut qanoq pinerluuteqarsimanersut Pinerluttunik Isumaginnittoqarfiup saqqummiuteqqunngilaa, tassani eqqugaasut qanigisaasullu eqqarsaatigalugit saqqummiunneqarnatik.

Powered by Labrador CMS