Naalagaaffeqatigiit ataatsimiinnerat: Nunanut allanut tunngasut inissinngitsut

Naalagaaffeqatigiinnermi siuttut pingasut Savalimmiut aamma Kalaallit Nunaata nunanut allanut tunngasuni suliani inissisimanerannut aaqqiissummik suli sulissuteqassapput. Savalimmiuni naalagaaffeqatigiit ataatsimiinneranni tamanna saqqummerpoq.

Naalagaaffeqatigiit ataatsimiinneranni inissikkusussimagaluarpugut. Savalimmiuni lagmandi Aksel V. Johannesen (J) ukioq manna januaarimi Kringvarp Føroyamut taama oqarpoq.

Kisianni naalagaaffeqatigiit marlunngornermi ataatsimiinnerisa kingorna, siuttut pingasut, Lars Løkke Rasmussen, Kim Kielsen aamma Aksel V. Johannesen, tusagassiortunut oqaluttuaraat, DFG-mik aaqqiissutip ineriartortinnissaanut aaqqiissummik nassaartoqarsimanngitsoq, taamaalilluni Savalimmiut aamma Kalaallit Nuaat nunani tamalaani nammineq sinniisoqarnerunissamut periarfissaqalerniassammata.

- Naalagaaffeqatigiinnermi soqutigisat aporaassinnaasarput, tamanna nalunngilarput. Ukioq ataaseq matuma siorna marlunnik aqqutilinnik (akunnaatsumik aamma inatsisitigut, aaqq.) suliniarluta isumaqatigiissutigaarput, tamannalu suli atorfilittatigut suli ingerlavoq. Oktobarimi naapikkutta killiffik takussavarput, ministeriuneq Lars Løkke Rasmussen Kringvarp Føroyamut oqarpoq.

Ammasumik oqaloqatigiinneq

Savalimmiut aamma Kalaallit Nunaat piffissami sivisuumi DFG-mik aaqqiissummi allannguisoqarnissaanik kissaateqarnikuupput, tassa imaappoq Savalimmiunut aaamma Kalaallit Nunaannut tunngatillugu Danmarkimut tunngassaaq.

Nunani tamalaani peqatigiiffinni nunat pingasut sinniiseqarfiini Danmark taasisussaatitaavoq. Tamanna ajornartorsiortitsigajuttarpoq, nunat taakku pingasut assigiinngitsunik soqutigisaqarsinnaasarmata.

- Nammineq sinniisoqarlutalu aalajangiisarniarpugut, Aksel V. Johannesen savalimmiormiut radioannut Rás2-mut taama oqarpoq.

Siuttut pingasut ataatsimiinneranni aalajangersimasumik kinguneqanngikkaluartoq, ataatsimiinneq pitsaasoq Naalakkersuisut siulittaasuat, Kim Kielsen oqarpoq. Imminnut ilisarisimaneruleriaramik oqaloqatigiinneq ajornannginnerulersimasoq, taassuma erseqqissaatigaa.

- Ammasumik eqqarsarluta oqaloqatigiippugut, sisamassaanik tallimassaanilluunniit naapikkatta attaveqatigiinniarneq ajornannginnerulerpoq, Kim Kielsen Rás2-mut oqarpoq.

Siulittaasuuffik

Aksel V. Johannesenip naalagaaffeqatigiit ataatsimiinneranni paasivaa, Savalimmiut Nunat Avannarliit Siunnersuisoqatigiiffiannut tamakkiisumik ilaasortanngornaviarunanngitsoq. Kisiannni Savalimmiut suleqatigiilluni ilaasortaaqatigiinnertut ittumik taarsiullugu sulissuteqartoqarpoq.

Kisianni Danmarkip Nunat Avannarliit Siunnersuisoqatigiivini siulittaasuuffik 2020-mi pissarsiarippassuk, Kalaallit Nunaat aamma Savalimmiut siulittaasoqarfimmut ilaatilerniarai saqqummiunneqarpoq.

- Siulittaasuuffik 2020-mi qanoq ilusilersorneqassanersoq paasissavarput, Lars Løkke Rasmussen Rás2-mut oqarpoq. Tamanna Savalimmiuni nuannaarutigineqarpoq.

- Suleqatigiisitani immaqa ilanngutissaagut, taamaalillutalu Nunat Avannarliit Siunnersuisoqatigiivini suut oqaluuserisassaanerannut sunniuteqarsinnaassalluta, Aksel V. Johannesen Kringvarp Føroyamut taama oqarpoq.

Powered by Labrador CMS