kommuninut qinersineq
KNR: Kamikposten paasissutissanik eqqunngitsunik saqqummiussivoq
Qinersinissaq aqaguttoq Kamikposten.gl-ip kommunalbestyrelsimut qinigassanngortittoq Kalaallit Nunaanni akileraartannginnerarlugu pasillerpaa. Pasilliutigineqartoq paasissutissanik eqqunngitsunik aallaaveqarpoq. KNR taama allappoq.
Siumumit qinigassanngortittoq Nicolai Niessen Nuummeersoq kommunimut qinersinissaq aqaguttoq Kalaallit Nunaanni akileraartarusunnginnerarlugu nittartakkamit Kamikposten.gl-imit pasineqarpoq.
Nicolai Nissenip HECA Nuuk A/S-imi aktiat danskit ingerlatseqatigiiffiat aqqutigalugu nittartakkap pisisimanerarpaa. Aktiat ingerlatseqatigiiffimmit Kalaallit Nunaanni adresselimmit pisiarineqarsimasut KNR-imut maanna uppernarsarsimavaa, taamaattumillu maani akileraartussaatitaasut.
Atuaruk: Nittartagaq politiinut unnerluutigineqartoq
Lars Andersen kamikposten.gl-imi akisussaasuunerartoq, Nissenip Kalaallit Nunaanni akileraartannginneranik oqaaseqarnini uppernarsarsinnaanagu KNR-imut nassuerutigaa.
Nicolai Nissenip kamikposten.gl eqqunngitsumik paasissutissiisimanerarlugu politiinut unnerluutigaa.