Gå til hovedindhold

Aasaq Karl Elias Olsenip saqqumilaarfia
Qularutissaanngilaq KNR-imi aasaq manna tusarneqakulaarnerpaaq tassaammat kajumissutsiminik aallakaatitassiortartoq, Højskolip pisortarisimasaa Karl Elias Olsen. Junimili sapaatit akunneri tamarluinnangajaasa ulluni arlalinni aallakaatitassiai, ilaat ’90-sikkunniili suliat, uteqqiattumik aallakaateqqinneqaqattaarput, ullaakkut ualikkut unnukkullu.  

Taakku KNR-ip naalaartoqarnerpaasarfiata nalaani 07.15 -08.00 aallakaateqqinneqaqqaartarput, nutarpasissunik aallakaatitsisarnerugaluaq, nal. 10.00-imut, naalaartoqarnnginnerusumut nuunneqarsimalluni. Sooq ’ullaanerani tusakkat’, ’aasap alianaanneranut’-mik qulequtserlugit piffissamut allamut, naalaartoqartannginnerusumut, nuunneqarnersut nassuiarneqanngilaq.

Karl Elias Olsenip aallakaatitassiarisartagai pitsaalluinnartuupput, sumiiffiit assigiinngitsut oqaluttuassartaannik imaqartarlutik. Aamma inuit nuttartarnerannut, oqaatsitsinnut, kulturitoqqamut, upperisatoqqamut, ajoqersuiartornermut niuernermullu tunngasunik imaqartarlutik. Ilisimatuut, ilisimasassarsiortut, ajoqersuiartortut, niuertullu allaaserisarsisaat, KNR-ip toqqorsivia aviisitoqqallu sukumiisumik paasiniaaffigisarsimagai tusaaneqarluarsinnaavoq, kiisalu nammineerluni paasiniaasarsimalluni.

Paasissutissat danskisuut kalaallisuunngortittarpai, oqaaseqatigiilerineri pitsaasuullutik, nipaalu tusarnaaruminartuulluni. Allaaserineqartarsimasut naalaartartut imaasitsiaannaaq pissarsiarisinnaanngisaat Karl Elias Olsenip pikkoriffigalugit ingerlateqqittarpai.  Ilisimatusarnerilli nutaanerusut malitsigisaanik paasissutissat ilaasa pisoqalisoorsinnaasarnerat eqqumaffigineqaqqissaarpasinngilaq. 

Tassaniippoq KNR-ip aallakaatitseqqiisarnerpassuisa ajornartorsiutitaasa ilaat.  Pissutsit ilisimasallu allanngoriartortarnerat KNR-ip tungaanit eqqumaffigineqarpasinngimmat. Aallakaatitassiallu amerlanerpaartaa qanga pisimasuneersuusarmata, inuiaqatigiinni suut tamarmik uninngasutullusooq inneranik qamani assiliaq KNR-ip aallakaatitseriaatsimigut akisussaaqataaffigaa.

Aallakaateqqitat amerlaqimmata ilaanni paatsiveruppallattarpaat ’immiussaq/lydfil’ sorleq aallakaateqqissanerlugu. Assersuutigalugu aallakaatitassiat arlaliusut ilaat siulleq immikkoortoq 1-tut aamma 2-tut ulluni tulleriinni aallakaatinneqarpoq augustip11-ani 12-nilu. Aallakaateqqitat uteqqattaartuarneqartarneri tusaajuaannalerlugit qatsunnarsisarput, paatsiveerunnarsisarlunilu aallaakaatitami sorlermi immikkoortoq sorleq tusarnaarneqarnersoq.

Aallakaatitat tulleriiaarneqartarneri KNR-ip akisussaaffigai, neriuinnassaagullu Karl Elias Olsen aallakaatitassiarpassuarminut akissarsisinneqarluarsimassasoq.

KNR-KU-mi nutaaliortoqarnissaa ilimananngilaq
Tusagassiortoq inuusuttunnguaq radiop pisortaatut atorfinitsinneqarmat ilimasuutigineqarsinnaangaluarpoq radio inuusuttorpalaartumik nutarterneqalissasoq. Killormulli pisoqarpoq. KNR radio aatsaat taama ’ittangatigilerpoq’. Unnukkut atuffassissutaasarsimasut toqqorsivinneersut, ullaap tungaa, ualikkut unnukkullu aallakaateqqinneqartalerput.

Atuakkiortut inuungallarnerminni atuffassissutinit akissarsiassannguaq inuttaanut, kingornussisussaanuunngitsoq, tuttarniassammat, KA-ip arlaleriaqaluni nutaanerusunik atuffassisoqartarnissaanik noqqaassuteqartarneringalui KNR-imit tusaaneqarneq ajorput.

Aallakaatitassiatoqqat ’inuugujoq’ aviisiliortunit nikerartunit aqunneqartartoq aamma ’mikrofoni alapernaatsoq’ assigiinngitsunik qulequtsersulaaginnartarlugu ingerlarsortuarput, nipilersuutigineqartartullu kinguaariinni marlunngulersuni nutarterneqarpiarnikuunatik.

Sapaammi aallakaatittakkat aalajangersimasutoqaapput, oqaluffimmi naalagiarneq toqqaannartumik, malitsigalugu ullup qeqqaanerani erinniarsuarnik tusarnaartitsineq.

Aallakaatitseriaatsit taamaatsillugit paasinarluarpoq inuusuttut amerlanerujartuinnartut KNR tusarnaarumasanngimmassuk. KNR Voice-mut qassit tusarnaartarnersut ilisimaneqanngilaq. Aamma KNR Voice meeqqanut inuusuttunullu soqutiginaatilinnik ataqatigiisitsisunillu namminerisaminik aallakaatitassiorneq ajorpoq, naalaartunillu akuliutsitsisarani, naak tamanna KNR-ip pisussaaffiinut ilaagaluartoq.

Nipilersukkat atorneqarnerannut KNR piginneqqaartumut akiliisussaatitaavoq, taamaattumik oqartoqarsinnaagunarpoq Voice aningaasanik nunatsinniit aniatitsilluataavissortartoq, allamiummi erinniaat atorneqartut amerliartortillugit nunatsinni erinniortut pissaat ikinnerulissapput.

Allannguisoqanngippat Voice-p inuusuttut radioattut ineriartortinneqartussatut KNR-ip takorluugai tunngavissaqarnersut apeqquserujussuarneqarsinnaapput. Ataatsimut isiginnilluni naliliissagaanni KNR-KU tassaaneruvoq ukiunik qaangiutereersunik aliannaarfissuaq inuiaqatigiinnilu pissusitoqqanik allanngortaliortitsivik. KNR Radiomi pikititsiniat radiorinngilaat, siunissamut isigisuunani, nutaaliortuunaniluunniit.

Naliliinerup tulliani sammineqassapput innarluutilinnut meeqqanullu aallakaatinneqartartut.

Grønlandsk