Gå til hovedindhold

Nick Nielsenip folketinginimiit soraasitaanera tassaavoq Kim Kielsenip pissaaneqangaarnerujussuarminik takutitsinera, Nielsenillu Aleqa Hammondimik uppititseqataaneranut ’qujanaq kingullermeernera’. Aleqa Hammondimik uppititseqataangamili Nick Nielsen Siumoqatiminit nuannaarineerutereerpoq. Qaqqasiortartoq Mont Everestimik qaqisigami nuannaartorisaalersoq, politikkikkut nutaraasorujussuuvoq, isumaqarsimangunarluni ilumoorneq naalakkersuinermillu ingerlatsinermi ileqqorissaarneq torersuunerlu parteeqatimini salliutinneqartartut, angusaqarniarluni ukapaatitsiniaatsit, pissaanermik atornerluinerit kammalaatersornerillu tunulliullugit. Nick Nielsenip unneqqarissuunini politikkikkullu nutaraavallaarnini politikkeritut soraarsitaassutigai. 

Moses Olseniungaluaq qanga Siumup itisuumik eqqarsartartorisaa qaasseeriaqaluni oqartoq tusartarpara aappillinngikkaluarluni sallusinnaaleraanni aatsaat politikkerersuanngortoqarsinnaasoq, taavalu illarasaararaaq. Isuma tamanna Siumup qullersaani malittarisassaalersimanersoq naluara. Kisiannili Naalakkersuisut atuuffianni sivikitsumi suliarinerlutat takkussuuttut amerlangaarmata taamatut eqqarsaqqajaanarpoq.

Illersunngikkussinga akerarisimassavassinga
Nick Nielsenimik soraarsitsineq Siumumi politikkerinut allanut, Siumup naalakkersuisullu qullersaannut isumaqataanatik oqaaseqartarusussinnaasunut aamma mianersoqqussutaavoq ersarissoq. Kielsenip oqariartuutaa ersarippoq: illersunngikkussinga akerarisimassavassinga! Tunuliaquttamini ’inupiluaqqanik angallateerarsortunik’ allanilluunniit akerlilersuisoqarusunngilaq. Partiip inatsisartuini ilaasortaalersut Kielsenip siunniussai maleqqissaassaneraat piffissap aggersup takutikkumaarpaa. Qinersivimmi kingullermi Siumup inatsisartunut ilaasortaatitaani eqqissiviilliortoqaqaaq. Inernerivaalumi Hans Enoksen, Siumumi naalakkersuisunilu siulittaasuusimasoq nammineq partiiliormat. Politikkimilu eqqissiviilliortitsisartut allat nutaqqallu Aleqa Hammondi politikkimiit uppiterujussuarpaat.

Neriorsuutit asuliinnartitat annersaat
Uggornarpoq Nielsenip soraasitaanerata kinguneranik tusagassiortut sammissuataalermassuk angut – maanamut - politikkikkut oqartussaajangaasoq sunniutaaruttorlu. Nielseni inuttaa isumaalu ataqqinarput, kisianni Nielsen partiimut sorlermut nuukkaluarpalluunniit nuunnera politikkikkut sunnguamilluunniit sunniuteqarnavianngilaq. 

Suli uggornarneruvoq Naalakkersuisut piliaannik allaffissuarsornikkut suliarinerlutarpassuit, taakkulu malitsigisaanik qanoq pisoqarsimaneranik qulaajaaniarnerpassuit, kingunerisaannik politikkikkut pisariaqavissumik  suliassat unitsinneqartutut immata, oqallinneq politikkimut sammiunnaarsillugu. Politikkeritta suliaat pingaarnerit tassaalerput uparuartuunnersuaq, pisuuteqattaannersuaq, mamarliineq, pisuujumanatillu assamminnik errorsinersuat, politikkikkut suliassatik tunulliullugit. Ammasuunissamik suleqatigiinnissamillu neriorsuuterpassuit ukiup issersuani qerrussuussimasutut ipput. Taakkuupput qinersisartunut neriorsuutit pingaarnersaanni asuliinnartitat annersaat. Illuatugiliuttut sanngiinnerujussuisa qanorlu ilioriaasissaaleqinerujussuisa, Kielsenillu qassutaanut napittorsimasutut innerisa, kinguneraattaaq qinersisartut politikkerinik qatsussingaluttuinnarnerat. Atassutip Demokratillu naalakkersuisooqatigiinni naalattussiaannartut inissisimanerisa Kielsenip pissaaneqarnerujussua sakkortuseriartiinnarpaat. Kielsen tassaalerpoq angut, kisermaassisutut, pissaanilissuaq.  

Grønlandsk