Gå til hovedindhold

Nannut nunaat

”Nannumik takungaluaruit aallaassanngilat”, taama Mettep oqarfigaanga takornarianut pisiniarfimmut Nanu Travelimut pappiaqqanik immersuiartorama aallaammik 30.06-mik patronissaanillu qulinik atornissannut uppernarsaatissannik. ”Taamaallaat nanoq tupatsillugu qimaatiinnassavat. Nannumilli takussangaluaruit seqqorianngittutilluunniit piniartut aallaariissangunarpaat.  Piniartut taakaniittuaannarput”. 

Mette arnaavoq eqeersimaarluinnartoq, sisamanik qitornalik ueqarlunilu, Nanu Travelimik ingerlatsiitsigaluni Guest Hausemik ingerlatsingallartoq. Isumaqatigiissimavugut Leiffilu Uunartumut unnuiartorniarluta. Uunnartoq tassaavoq nunaqarfiusimasoq silasiorfiusimasorlu. Aqqatalu oqaluttuaraa nunatsinni erngit kissartoqarfiit ilaat tassaniittoq. Ullutsinni Uunartoq nannunniat, allanik piniariat, takornarissallu uninngaarfigisarpaat. Alianaatsorujussuunerarlugu Mettep oqaluttuunnikuuvaanga, unnukkullugooq arsarnerpassuaqartarluni. Tassalumi aamma nanoqqarfissuugilluni. Pasittaakkaluttuinnarpungalu nannut ingerlaarfissuarigaat, tassami maaniitsiarnitsinni tallimanik nannuttoqareermat.

- ”Maani nannuttassat 35-viupput, Mette nangippoq, aallaasissama tigunissaanut, sillimasiinermullu pappiaqqanik immersuininni, ilanngullugulu allattussaavara arlaatigut aqqunassangaluaruma kina siulliullugu attavigineqassanersoq. 

”Imminut illersorlutik nannumik  pissaqassangaluaruit maani pisassanut ikilisaataassaaq, tamannalu maanimiunit ajorineqartartorujussuuvoq” Mette erseqqissavoq, paasivaralu malittarisassat maleqqissaarneqarnissaat sillimaniarnerlu pingaartillugut oqaluttuukkaanga. Illoqqortoormiullu takornariaqarfissuunerat paasiartuaalerpara, siorna umiarsuarsuit 18-it maannga aqqusaarsimammata. 

”Qimusseriarlutik takornarissat takkussuunnissaa aanaralaannguanngorpoq, qimussertitsinissallu nalaani inissat tamarmik ulikkaartitereerput. Nunarsuatsinni kangerluit isorartunersaannut, nunarsuatsinnilu pinngoortitamut eqqissisimatitat annersaannut ulluni 3-5-7-ini piniartut peqatigalugit unnuiartortarluni qimussiussisarnernik neqerooruteqartarpugut, taakkuninnga perusunngitsut nammineq aqqutissaminnik pilersaarusiorsinnaapput, aamma piniartunik ilaqarlutik puisinniartunut peqataasinnaallutik, namminnerli piniaqqusaanngillat”, tulluusimaarpalunngitsoorani Mette oqaluttuarsinnarpoq.

- ”Maani malittarisassaqarpugut nannut kisimiittut kisiisa pisarineqartassasut. Arnavissat piaqqisartut, nannulluunniit suli allivinngitsut piniarneqarneq ajorput, allilluarnissaat utaqqineqartarami. Siornaanngorpoq politeeq Danmarkimiit tikerlaaq piaralimmik nannukkami, assorsuaq kamaatigineqarpoq. Siullermik nannoqqusaanani pisaqarami, aappassaanillu maani malittarisavut unioqqutillugit piaqqamik pisaqarluni. Piniartunit nipituuliorfigalugu naveerneqarujussuarpoq. Amii Nuummut nassiuppaat, neqaallu pisortat suliffeqarfiinut agguaanneqarlutik. Politeerli unioqqutitsisoq tulluusimaanginnarpoq nannunnissamik takorluukkani piviusunngormat”.

Uangali eqqarsaatigijunnaarsinnaanngilara qanoq pisoqassanersoq kisimiillunga nanorsuarmik naapitseriataassangaluaruma – tassa unnukkut piniartut tamarmik angerlareerpata uanga Leiffilu 30.06-mik aallaaserluta Uunartumi unnuilerutta. Imminut illersorlunga nannumut seqqorsinnaanissara qulakkeerusullugu apereqqippunga nannup saassutissangaluarpanga aallaasinnaannginneringa. Nannut pillugit oqaluttuarpaalussuit Uunartumeersut tusareersimaleratsigit ilukkut aarlerimmisaartalerlunga misigingama, unnuaanerani igalaakkut nanorsuaq itsuariataassangaluarpat qanoq iliortariaqarnera eqqarsaatigilereerakku. Metteli malartitassaanngilaq. ”Naamik aallaassanngilat” aalajangersimarpalulluni akivaanga, eqqissisarniarunarlungalu nangilluni:” Piniartoq Eineri Uunartumi najugaqarpoq, illorpassuaqarfimmi Illoqqortoormiusut angitigisumi sussanerluni nalugamiut Uunartormiuuvoq, maannga qallunnialaaginnartarpoq, taassumalu nannunniarneq ilisimasaqarfigilluaqqissaarpaa”. Einerimit illersorneqarsinnaanerput tusarakku, eqqissiimisinneqarlunga Uunartuliarnissannut piareersarnera nangippara. Siullermilli minihallimi aliikkusersueqqaartussaavugut Illoqqortoormiormiut aliikkusersuisartut peqatigalugit. Aaliikkusersuinissarpullu, nannut nunaannut Uunartuliarnissatsitulli qilanaaritigaara. 

Grønlandsk