Gå til hovedindhold

Naliliineq: KIMIA***** 

Rock’n heavy
Nipilersoqatigiit imminnut KIMIA-nik atsersimasut qanittukkut cd-mik saqqummersitsipput, aamma ITunesikkut WIMP-ikku saqqummersumittaaq. CD-ip nipigissarnerata cv-a (oqaluttuassartaa) tupaallannalaanngitsuunngilaq. Nipilersukkat oqimaannerusut rock’n heavy-nut eqqaanarnerupput, nipigissarluaqqissaakkat, nipit qammarsui akimorlugillusooq tusarnaartartunut, tamat nuannarisaannik pop-nik qatsusisunut, apuulluataavissut. Matuma allannerani Kimia ITunes top Rockimi nr. 11-ngorsimavoq, Sume-kut inissamik ataatsimik qaangerlugit. Tamannaannarluunniit imaannaanngeqaaq.  

KIMIA nipilersukkallu
Miki Fencker Thomsen erinarsortutut sallersaralugu, nipilersoqatigiit inuttai allat tamarmik ilisarisimaqarlutillu nipilersullaqqimmassuupput, ukuullutik Angunnguaq Larsen (lead guitar), Kilaasi Møller (guitar), Hasju Damgaard (bas) Nino Fencher (tumerparpaat). Ataatsimoorlutik cd-mi erinnat qulit suliarisimavaat. Taallaasa imaraat asanninneq, sex, avinneq, inuunermi toqqaassussaatitaajuarneq, atugartuussuseq, akerliunerlu. Tusagassiutini nalunaarutikkut erserpoq taallat kimillit nipilersoqatigiit salliutinniaraat. Qularnanngilaq aqqat Kimia taakkunangaanneerpoq.
Erinnat nipilersoriaaserlu eqqissisimasumik rock’n heavy-unerupput, guitarit nipaat assigiinngitsunik sakkortusiartortittaqattaarlugit, nipinut akustiskiusunut akoorussat, bassimik tumerparpaanillu patajaatsumik oqimaatsukullassuarnik oqimaalutserneqarsimasut, sallaatsuniit oqimaatsunut qatituunullu nikerartinneqartut. Miki F Thomsen qassaaqqissumik qataakannersumik erinaqarpoq, nasalimut qataatsuararsuanngortinngikkaluarlugu erinnani qataannerni erinni nipilersuutitut pinnguarisinnaallugu. Nipilersukkat taamatut katiterneqarsimanerat nuannersumik oqimaaqatigiisitsivoq, erinnat aaqqissuunnerini aamma nipilersuutitalersorneqarnerini eqqarsaatigalugit. 

Tusaamasarsuit immiussisarfii
Erinnat Nuummi Barzanti-mi immiunneqaqqaarsimapput. Taavalu nipigissarneranni silarsuarmi immiussisarfinni tusaamasani kaavilukaarsimallutik, siullermik Darren Lawson-imi London-imi, taava Ted Jensen-imi New York-imi. Taakkunani nipit suliareqqinneqarlutillu saqqummersinnissaannut piareersarneqarsimapput. Inernerilu  tusaaneqarsinnaapput – nipilersukkat pitsassuit, nipigissarluakkat, immiussaq ataatsimut torrallataq. Immiussisarfinni taakkunani nipilersortartut tusaamasarsuit immiussisarsimapput, assersuutigalugit Wolfmother, Emile Sande, Eagles, Muse aamma McCartney. Wow. Oqaluttuarisaanermi rockertartut tusaamasaanerpaarsuit immiussisarfigisimasaat tusaannarlugit KIMIA-kkut ummataat kassoruloortaqattaarsimassapput.

Eqqissisimaneq aliasuppalunnertalik
Naak uanga siutinni tusaasakka nipilersukkat rock’n heavy-tut taarusunnerungaluarlugit, taamaattoq immiussat ataatsimut tusaallugit nipaanni aliasuppaluttoqarsorinarput, isornartorsiuerpaluttoqarlutik, kamaqarpalungajallutillu, minnerunngitsumik erinarsornerup pilersitaanik. Nuannaarpaluttoqarpallaanngilaq, kisianni qamuuna eqqissisimaqqissaarnermik, toqqissisimanermik nalorninnginnermillu peqarpaluttoqarpoq. Nipilersukkat ilaasigut ”The Fab Four” lp-liaannut The White Albummimut eqqaanartortaqarsinnaapput, nipi aliasuppalungajanneranni, soorlu taamani nipilersoqatigiit isasuulivinnerat sioqqutitsiarlugu tusaaneqarsinnaasimasumi, naak albummit taakku imminnut assersuunneqarsinnaanngikkaluit. Taamaakkaluartorli KIMIA saqqummersitaavoq ”allasunnitsumik pitsaassusilik, kimittooq”. Kalaallisut rock’n heavy-liamut KIMIA-mut ullorissanit arfinilinnit tallimat. 

 

Grønlandsk