Gå til hovedindhold

Juullileqaaq

Naliliineq: Nuannareqaara – juullisiutit ***

Erinniarsuarnik erinarsornermut illiniarsimasunik nunarput marlunnik peqarpoq. Tassaapput Ida Heinrich aamma Josef Lund Josefsen, tamarmik Söngskolen Reykjavikkimi ilinniarsimasut siulleq mezzosopranitut aappaalu tenoritut. Noqartilissortartoq Søren Johansen peqatigalugu taakku juullisiutinik kalaallisuunik erinniarsuarpalaartunik immiussisimapput, erinniarsuarmi nipilersortarnermi nipilersuutit allat atorneqartartut ilaat aamma atorneqarsimallutik. Cd ateqarpoq ”nuannareqaara”, juulleriartornerani juullip oqariartuutaanik nuannersunik itisuumik eqqarsarluni tusarnaarnissaamut tulluarluinnartusoq .

Kalaallit operamik erinarsortartui
Erinarsortartut marluullutik nunatsinni nuannarineqarluartuupput, sinerissami angalaarlutik tusarnaartitsiartortarlutik kalaallisut erinarsuutivut erinniarsuartut erinarsoriaatsimik atorlugit tusarnaartitsisarlutik. Erinarsortartut taakku ilinniarsimasaannik, tassalu operamik erinarsuutinik, tusarnaarusuttartut ajoraluartumik ikitsuinnaapput. Kalaallisulli erinarsuutit erinniarsuartut erinnarsorneqarsinnaanerat aamma ajunngivippoq, nunatsinnilu erinarsoqatigiinni ilaasortarpassuaqarpoq taakku erinarsornermut ilinniarsimasaannik iluaquteqarlualereersunik.

Juullerpaluttunik tusarnaartitsisut

Erinarsukkat nipilersuutillu nuannareqaarami aaqqissuuneqarsimanerat.
Kalaallisut juulliutitsinnik Idap Joseffillu erinarsorneranni erinnat nipilersuutillu aaqqissorneqarnerat ajornanngitsunnguamik pisimavoq. Kisimiilluni tulleeriilluniluunniit erinarsorneq noqartilimmik igiorteqarluni, erinnallu ilaanni erinniarsuarnut nipilersuutaasartut allat ilaat pattagiarsuaq, agiaq, cello aamma qarlortaat flute atorneqarput. Erinarsortartut marluullutik erinagissuunerat qularutigineqarsinnaanngilaq, Joseffilu tussiutini arlalinni, kisimiilluni erinarsukkamini,   tenoritut erinnarsortartuittut tutsiutivissortarpoq, Hay Malotte-llu tussiusiaani ”ataataarpooq”-mi operamik erinarsuissortutut uanga siutinni nipeqarluni.  

Taavalu Ida Heinrich. Erinarsorluaraangami erinagilluinnartuuvoq, kisianni nuannareqaarami erinnat ilaanni soorluunani pisinnaasani tamakkerlugit erinarsunngitsuulaartartoq, erinnat qataannerpaat anguniartarnerini. Joseffilluli tulleeriikkangamik akioriillutilluunniit tusarnerluinnartumik nipeqartarpoq. Naak nuannareqaarami tusarnersuliortoqaraluaqisoq, erinnat erinniarsuartut tussiarneqarnerini ippinnartoq tassaalersarpoq oqaatsit kalaallisuut qallunaap oqaanik aninneqartutut nipeqalersinneqaqqajaasarmata, soorlusooq palasit qallunaat tussiariaasiannut assigusumik. Alla ippigisara tassa noqatillup nipaata innaallagissamoortumut eqqaanagajattarnera, immaqa immiussinermi teknik tassani apeqqutaasimassaaq. Nuannareqaara erinarsortartut taakku marluk pernaatigalugu namminneq saqqummersitaraat.

Juullisiutit nuannersuaannartut
Tamakku tamarmik oqaatigineqareerneranni aamma oqaatigisariaqarpoq nuannareqaara tassammat juullisiutinik tussiarluni saqqummersitaq tusarnersoq, kalaallisullu tussiutinik saqqummersinneqartartunit allanit allaanerusoq (naak kalaallisut juullisiutitta  erinniortui tamarmik allamiuugaluartut), erinniarsuartut erinarsortartunik kalaallinik marlunnik pikkorissunik erinarsorneqartoq . Cd-lu qanorluunniit nalilersorneqaraluaruni tusarnaartartunit alutorineqarluni pisiarineqartorujussuulereerpoq, qularnanngilarlu, juulleriartornerani angerlarsimaffippassuarni qamuuna nuannaarnermik itisilerinermillu tunniussaaqarumaarluni, qilanaarluta juullissamut piareersarnitsinni. Ullorissanit arfinilinnit  pingasut qummut sammisulerlugit nuannarneramut tunniunneqassapput. 

Grønlandsk