Nuutoqqami nutarterinikkut pisoqqat uumassuseqarluartumik ullutsinnut ikaarunneqassapput, amerlasuunut iluaqutissanngorlugit. Taamaattumik uanga Nuutoqavimmi, maanna NAIP illuata eqqaani, illu isiginnaartitsisarfik aamma silami isiginnaartitsiviliortoqarnissaa tapersersorpara. 

Lokalplanit oqallisaanerat
Nuutoqqap nutarterneqarnissaa pillugu oqallinneq piffissami matumani annertuseqqippoq, Inatsisartut siulittaasuata inatsisartut illussaarsualiassaat Aqqaluks pladsimi, issittup naatsiiviisa inaanni sananeqassasoq kissaatigimmagu. Oqallinnerli tassunga tunngasoq suli naammassineqanngilaq.

Nuutoqavimmulli ( kolonihavnip eqqaanut) lokalplani siornaanngorporli akuerisaareerpoq, demokratiskiulluartumik tusarniaassutigineqareernerata kingorna. Peqatigiiffiup Nuummi Eqqaamasat Nuutoqqami nutarterisoqarnissaa soorunami akerleraa. Uangali isumaqarpunga NAIP nutaamik illuliuunneqarnissaa silami isiginnaartisarfimmik ilallugu sumiiffimmi isiginaartitsisarnermut qititarnermut nipilersortarnermullu iluaqutaalluassasoq, taamatullu isiginnaariartartunut, inuussutissarsiortunut namminersortunut aamma takornarialerisunut.

Peqatigiiffiup Nuummi Eqqaamasat siunnersuutigaa maana NAIP illua assilisanik saqqummersitsiviusalissasoq. Tassunga oqaatigiinnartariaqarpoq illutoqannguaq taanna pisoqaangaarami ussiilluni,kusertaqaluni, ikeralu aassimalluni, iluarsartuunnissaa imminut akilersinnaanngimmat. Kiassaata pisoqaaqaaq, illup ilua timmiaaqqallu silamiittut ataatsikkut kiassartarlugit. Innaallagissamut aqqutai ersiinnarput ullutsinnilu isumannaallisaanermut piumasaqaatinut naleqqutigunaratik, soorlittaaq perusuersartarfeqarnera eqqiluisaarnissamullu tunngasut allat ullutsinnut naleqqutinngivillutik. 

Nutarterineq uumassuseqarnerutitsilissaaq
Taamaattumiguna NAIP kissaataa annerpaaq tassaasoq nutaamik illutaarnissaq, akissaminnillu katersineq ingerlappaat. Ajornartorsiutitaa uaniippoq ilaasortat amerlanersaasa kissaatigimmassuk illu nutaassaaq maanna toqqavippiaaniissasoq, allaniinnani. Toqqaviatigulli nutaamik illuliortoqassappat pisoqaq peertariaqarpoq, nutaaq sananeqarsinnaaqqullugu. 

NAIP-ip nutaamik illoqalernissaanut lokalplanimi inissaqarpoq, maanna illorisaata eqqaralannguani. Illu nutaaq aamma silami isiginnaartitsiviliornissaq isiginnaartitsisarnikkut, qitinnikkut nipilersornikkullu periarfissanik nutaanik ammaasissaaq. Qitinnernik isiginnaagassanillu piareersarnerit illumi ingerlanneqartut, silami ilulluunniit iluani takutinneqarsinnaallutik. Amma kina oqaramami ukiukkut upernaakkullu silami aliikkusersuisoqarsinnaanngitsoq?

Oqaluttuatoqqanit isiginnaagassiat
Takutinneqartartussat tassaasinnaapput kalaallit oqaluttuatoqaannit isiginnaagassiat, quiasaarusianik, qitinnik nipilersornernillu akullugit. Aamma ukiukkut juullilernerani illuigaasat atorlugit ”ukiup nunaa” imaluunniit  “ullukinnerup nunaqarfia” alutornartumik pilersinneqarsinnaassangaluarpoq. Taamaasiornikkut pisoqqat uumassuseqarluartumik ullutsinnut ikaarunneqassangaluarput, amerlasuunut iluaqutissanngorlugit.  Taamaattumik uanga silami isiginnaartitsiviliortoqarnissaa isumaqatigaara. 
 
Juaaka Lyberth
Nipilersortartoq atuakkiortoq,
Nunatta isiginnaartitsisarfiata siulersuisuini siulittaasoq.