”Sianiitsut tamarmik isornartorsiuisinnaapput”, tassa KNR-ip pisortaata Søren Lennert Mortensenip KNR-mik naalaartartunut isiginnaartartunullu oqariartuutaa. Taanna atuarneqarsinnaavoq isumaliutersuutitut nammineerluni allattagaligaani KNR-ip  nittartagaani, 1.juli saqqummersinneqartumi. Piffiit nutaat, isummat nutaat , piviusut ilungersunartut, Mortensenip isumaliutersuummini qulequtarai. Oqariartuutaasalu ilungersunarnerat ilumoornerarneqarsinnaavoq. Naalaartartorpassuit isiginnaartartullu aallakaateqqinneqartartorpassuit naammagittaalliutigiuartarpaat. Taakkununnga KNR Pisortaa allappoq ”sianiitsut kikkulluunniit isornartorsiuisinnaapput”. Ilanngullugulu allappoq, atorsinnaasunilli siunnersuisoqarsinnaavoq. Ilumut, sianiitsunut allaat pitsaasunik siunnersuisinnaapput. Taamaattumik isornartorsiuilinnginnermi marloriarluni eqqarsartariaqassaaq, imminut sianiittorsuartut nittarsaatilinnginnermi. AG-p pingaarnerutitamini KNR pillugu isummersortarnera aamma kamaatigilluinnarsimavaa, taakku uparuarmassuk innuttaasunik KNR sullissiniaruni aatsaat immikkut akilerseqqeqqaarluni taamaaliorusuttarmat. Aviisini isummersortartut tassaanerarpai angutit utoqqaat isumaluttuaannartut. Aamma taanna tusagiasaarutaagallarujoq. Ilumoorpoq nipit nutaarluinnaat  atorlugit KNR-ip pisortaa naalaartatuminut isiginnaartartuminut suleqatigijumaakkaminullu saaffiginnimmat. Isumaliutersuutaani (pingaartumik qallunaatuuvani) oqaatsit atugai innuttaasunik sullissiviup pisortaanit anisinneqartussatut piukkunnarnerpaajunngikkaluarput, Sermitsiami ”inupiluaqqat isersimaartarfianni” atussallugit naleqqunnerullutik, KNR-millu atuisartunik suleqateqarnissamik kajumissaarisuunngivillutik. Isumaliutersuutip soqutiginaataasa ilaat tassa kalaallisuua qallunaatuualu assigeeqissaanngimmata, assersuutigalugu oqaaseq ”sianiitsut” kalaallisuuani ilaanngilaq. Tamanna piaaraluni iliuusaanersoq nalunaqaaq. Qularnanngilarli isumaliutersuut taanna nutaamik allanneqaqqittariaqarunaraluarmat, akerartuutaasaanngitsunik suleqatiginnikkusussusermilli immerlugu.