isikkamik arsaanneq
Zidane El Clasiconnginnermi: Ungasissuseq soqutigissanngilarput
Real Madridimi unammisartut, arfininngorpat FC Barcelona unammilerunikku, inissisimaneq puiussangaat, Zinedine Zidanep oqaatigaa.
Spaniami ligami FC Barcelona 11 pointinik siuaqqavoq. Tassa arfininngorpat Madridimi "El Clasicortoqannginnerani" Real Madridimut sisamaattut inissisimasut piviusut.
Realikkut unamminermik ataatsimik ikinnerusunik unammisimagaluarput, taamaakkaluartoq Real Madridikkut pissartanngoqqinnissamik neriuuteqassagunik, unamminermi pinngitsooratik ajugaasariaqarput.
Sungiusaasulli Zinedine Zidanep unammisartuutini inissisimaneq akeqqallu ungasissusaat soqutiginaveersaaqquaa.
- Ernumanngilagut. Unammilluarnissarput eqqarsaatigilluassavarput. Aqqaniliunerput, arineq-pingasuunerput imaluunniit 25 poitinik kinguaqqanerput eqqarsaatigissanngilarput. Akeqqagut nukittuut unammilluassavagut, franskeq sungiusaasoq oqarpoq.
Taassuma unammisartui ligamik marloriarlutik ajorsareersimapput, Barcelonalu suli ajorsartinneqarsimanani.
- Qularutissaanngitsumik sæsonimi unamminissani sakkortunerpaassaaq. Madridip Barcelonallu unammisarnerat kusanartuaannarlutillu sakkortujuaannarput. Isumassarsiortittarpaatigulli. Unammisartut taamatut unammerusuttuaannarput. Ulloq unammivissaq erininartuaannarpoq, Zidane oqarpoq.
Taassuma qularnaveeqqutigaa, Cristiano Ronaldo portugalimiu sapaatip-akunnerata aallartilaarnerani immikkut sungiusartarsimangaluarluni 100 procentimik piareeqqasoq.
"El Clasico" arfininngornermi nalunaaqutaq 13 aallartissaaq. Unamminnginnermi Barcelona 16-eriarlutik unamminerni 42 pointinnassimapput, Realikkulli 15-eriarlutik unamminerni 31 pointit pissarsiarisimallugit.
Holderujussuit taakku akornanni inissisimapput Atlético Madrid aamma Valencia taakku aappaattut pingajuattulli inissisimapput.
/ritzau/