Skip to main content

Zacho timmisartoqarfissat nutaat pillugit: Ammasumik oqaloqateqartarniarpugut

Kalaallit Airports A/S-ip siulersuisuini siulittasunngorlaap Kjeld Zacho Jørgensenip pingaartippaa, mittarfinnik ingerlatseqatigiiffiup kikkunik tamanik ammasumik oqaloqateqartarnissaa - tassa Kalaallit Nunaanni attaveqaatit pillugit suliat annersaannut tapersersuisut isornartorsiuisullu oqaloqatigineartarnissaat.

Kalaallit Nunaanni pingasunik nutaanik timmisartoqarfiliornissamik aalajangertoqarnea oqallisaasimaqaaq. Allat taamatut aalajangerneq tikilluaqqugaat, allat akisuallaanerparpaat. Aamma Nuummi timmisartoqarfiliorniarneq mittarfiullu takissusissaata oqallisigineqartuassangunarpoq.

Mittarfinnik ingerlatseqatigiiffik ukiaq nutaamik siulittaasortaarpoq, Kjeld Zacho Jørgensenilu Air Greenlandimi siulittaasuunerminut taarsiullugu Kalaallit Airportsip ingerlatseqatigiiffiutaanni pingasuusuni: Holdingimi, Internationalimi aamma Domesticimi siulittaasunngorsimavoq.

Ullualuinnarni eqqarsarfeqarsimasoq

Kjeld Zacho Jørgensen oktobarip aallartinnerani Namminersorlutik Oqartussanit attaveqarfigineqarsimavoq, ullualuinnannguillu periarfissarisimavai suliffimminik taarsissanerluni eqqarsarnissamut, taanna Sermitsiaq.AG-mit apersorneqarnermini ilisimatitsivoq.

- Kalaallit Nunaanni attaveqaatit annersaannik sanaartornermi siulittaasoorusunnersunga Namminersorlutik Oqartussanit aperineqarnera uannut annertuumik tatiginninnerusoq eqqarsarsimavunga. Aperineqarama nuannaarlungalu ajukkuppunga, ilisimaarilluinnarakkumi suliassaq pingaaruteqarluinnartoq pineqartoq. Tamatuma kingorna eqqarsaatigaara, Namminersorlutik Oqartussat ikiuukkusunnersunga aperimmannga, naaggaarsinnaanngitsuungama akuersisimallunga, Kjeld Zacho Jørgensen Johannus Egholm Hansenimik siulittaasutut nammineerluni tunuarsimasumik taarsiisimasoq nassuiaavoq.

Kjeld Zacho Jørgensenip Air Greenlandimiit Kalaallit Nunaata qitiusutut iluaqutigisaaniit, attaveqaatissatut suliniummut nuunniarluni aalajangerami ilisimaarilluinnarpaa, tamanna akerlerineqaqalunilu politikkikkut isorineqarsimaqisoq.

- Isumaqarpunga attaveqaatissanik annertuunik suliaqartarneq tamatigut akerleriiffiusartoq. Tassunga atatillugu eqqaavaa, Storebælt attavilerniarlugu sanaartorneq Danmarkimi oqallisaasimaqisoq. Sanaartornermi sanaartornerullu kingorna isummat sakkortuut atorneqartarsimapput, sanaartugarli ullumikkut kialluunniit pinngitsoorsinnaanngilaa. Timmisartoqarfissanut tunngatillugu tamanna aamma atuutissasoq isumaqarpunga. Kalaallit Airportsimi suliassaq aalajangiussat naapertorlugit naammassiniarlugu pingaarutilimmik suliassaqarpugut, tamatumunngalu peqatigitillugu kikkut tamaasa ammasumik oqaloqatineqartarnissaat qulakkiissavarput - tassa tapersersuisut akerliusullu oqaloqatigineqartarnissaat, siulersuisuni siulittaasoq oqarpoq.

Timmisartoqarfinni pissutsinik ilisimasaqarluartoq

Niuernermik ingerlatsineq eqqarsaatigissagaanni Kjeld Zacho Jørgensen suliarisartakkaminik, Billund Lufthavnimi ukiuni arlalinni ineriartortitsinermik angusaqarluartarnermillu ingerlataqarfigisarsimasaminik suliaqaqqilissaaq.

- Soorunami Billund Lufthavnimi ukiuni arfineq-pingasuni pisortaanertut suliaqarsimaninnit timmisartoqarfinnut timmisartoqarfimmillu ingerlatsinermut tunngassuteqartunik ilisimasaqarluarpunga. Uannut taakku arlaannaalluunniit pingaarnerusimanngilaq, taamaammat Namminersorlutik Oqartussat Naalagaaffillu isumaqarpata, Kalaallit Airportsimi ajunngitsumik allannguisinnaasunga, aap taava sulerusuppunga, siulersuisuni siulittaasoq Norgemiittumi Bergenimi najugaqartoq nassuiaavoq.

- Billund Lufthavnimi sulisimanera tunngavigalugu nalunngilluinnarpara, immikkuualuttorpassuit assigiinngitsut timmisartoqarfik ingerlalluassappat imminnut ataqatigiittussaasut. Aamma nalunngilara timmisartoqarfik ingerlalluartoq inuiaqatigiinnut qanoq pingaaruteqartigisoq. Timmisartuutileqatigiiffiit atuutereersut nutaallu suleqatigineqartarneri siunissami ineriartortitsinissamut tunngaviuvoq, taamatullu suleriaaseqarsimanera Billundimi ukiuni arlalinni sulininni angusaqarluartarsimanermut pissutaaqataalluinnarpoq, taanna erseqqissaavoq.

Kalaallit Airportsip ingerlatseqatigiiffiutaani pingasuusuni siulittaasunngornermi saniatigut Danmarkimi Norgemilu siulersuisuni arlalinni ilaasortaaffeqarpoq. Kalaallit Nunaannukaqqinniassagami coronamut atatillugu killilersuutit atorunnaarsinneqarnissaat qilanaaraa.

- Kalaallit Nunaaanni siulersuisuini pingasuni atuuffeqartussaangama, nunani assigiinngitsuni killilersuisoqarani angalasoqarsinnaanngorpat, ukiumut arlaleriarlunga Kalaallit Nunaanniittassaanga. Immaqa ukiumut arfinileriarlunga arfineq-pingasoriarlungaluunniit siulersuisut ingerlatseqatigiiffillu ataatsimeeqatigisassavakka, piginnittut ataatsimeeqatigisassavakka minnerunngitsumillu sanaartorfiit pulaartassallugit, taanna oqarpoq.

Air Greenlandimi sulisimaneq

Air Greenlandimi sulisimaneq naammaannartututu isiginngilaa, ukiullu pingasut avillugit siulittaasuusimanermini susoqarsimanersoq oqaluttuaralugu.

-Air Greenlandimi siulittaasutut atuuffik soqutiginarluinnartuusoq isumaqarpunga. Ingerlatseqatigiiffiuvoq kusanartoq patajaattorlu Kalaallit Nunaanni tulluussimaarutigineqarsinnaasoq, ukiullu pingasut avillugit tassani suleqataasimanera kingumut qiviarlugu nuanneqaaq. Coronap ajornartorsiortitsinera siulersuisuni atuuffimma taarsernissaanik eqqarsaateqarsimaninnut attuumassuteqanngilaq. Isumaqarpunga Air Greenland piffissami ilungersunartorfiusumi Kalaallit Nunaata attaveqaataanut qitiulluinnarluni pikkorissuseqartumik isumaginnissimasoq. Inuiaqatigiinni suliassaq aningaasarsiornissarlu oqimaaqatigiissillugit ingerlassimavai, Kjeld Zacho Jørgensen oqarpoq.

Piginneqatigiissutinik niuerneq, periusissiaq nutaaq isumaqatigiissutinillu nutarterinerit Air Greenlandip suliaqarnerani initusimaqaat.

- Ukiumi siullermi ilaatigut ingerlatseqatigiiffiup isumannaatsumik ingerlanneqarlunilu ineriartortinneqarnissaa suliarisimavarput, ilaatigullu SAS-ip Naalagaaffullu piginneqataassutaanik tigusinissaq suliarisimallutigu. Siulersuisuni ilaasortat tamarmik taakku pillugit suleqatigiissimapput, Suliallu naammassimmata tamatsinnut nuannersimaqaaq. Tulliullugu nutaamik periusissiosimavugut, Namminersorlutillu Oqartussat kisiisa piginnittoralugit piffissamut ungasinnerusumut Air Greenlandip allatut siunnerfeqarnissaa suliarisimallutigu. US Air Force-mut isumaqatigiissut, kiffartuussinissamut isumaqatigiissutit kingullertigullu Ujaasillunilu Annaassiniartarnissamut isumaqatigiissut initusimaqaat. Suliassat taakku tamarmiullutik ingerlatseqatigiiffimmut pingaaruteqarluinnartuupput. Isumaqarpungali, siulersuisuni aqutsisunilu samminerpaasimasarput tassaasoq, timmisartoqarfiit taakku pingasut atuutilerpata ingerlatseqatigiiffiup inissisimaffigiligassaa. Air Greenlandimummi nutaanik periarfissaqartitsilerlutillu unammillertitsilertussaammata, taanna Bergenimi angerlarsimaffiminiit erseqqissaavoq.

Kjeld Zacho Jørgensenip nuliaraa Hege. Marluullutik tallimanik qitornaqarput, sisamanik ningaqarput/ukuaqarput/aappaqarput, ataatsimik ernutaqarput – ataatsimillu qimmeqarlutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER