Youtubemi suliaqartoq timmisartup angalaqqaarnissaanut piareersartoq
Youtubemi ilisimaneqarluartoq, timmisartunillu naliliilluni videoliortartoq, Josh Cahill, Air Greenlandip Airbus A330-800 timmisartuutaa nutaaq, tassa Tuukkaq, Kalaallit Nunaannut angalarngaalerpat timmisartumi ilaassaaq.
Josh Cahill Norsap paarlattaa Tuukkaq Kalaallit Nunaannut angalaqqaalerpat ilaanissaminik kissaateqarpoq. Kissaataalu maanna piviusunngulerpoq.
Taanna Sri Lankamiit Frankrigimi Toulousemut arfininngorpat angalassaaq, timmisartorlu nutaaq timmisartuliorfimmit Air Greenlandimut pisortatigoortumik tunniunneqalerpat, sapaatip akunnera tullermi peqataassalluni. Tamassuma kingorna Tuukkamut ilaalluni Toulousemiit Kangerlussuarmut, pingasunngorneq 7. december angalanermi siullerpaami ilaassaaq.
- Anguniagaq iluatsippoq. Katjap (Vahl, aaqq.) angalanermi siullermi ilaasinnaasunga akuerimmagu taama eqqarsarpunga. Timmisartut nutaat pisortatigoortumik tunniunneqartillugit ilaatigut ilaasareernikuuvunga, unali angalaqqaavinnermi peqataanissaq immikkuullarilluinnarpoq. Malinnaasukka amerlanerpaartaat isumaqarput Kalaallit Nunaat pillugu video suliara soqutiginarnerpaallunilu pitsaanerpaasoq, Josh Cahill Sermitsiaq.AG-mut oqarpoq.
Aaqqissuussaq kusanarluinnartoq aallartilerpoq
Josh Cahill ilisimatitsivoq Sri Lankamiit Nuummut aasaq manna angalaneranut tunngasoq video youtubemi 300.000-it pallillugit isiginnaarneqareersimasoq. Josh Cahill youtubemi 575.000-init malinnaasoqarpoq, timmisartullu pillugit naliliisarnermik, angalanermullu tunngasunik videonik saqqummiussisartuulluni.
- Timmisartup nutaap tunniunneqarnissaanut angallasseqqaarnissamullu tunngatillugu aaqqissuussatut pilersaarutit takuakka, ajunngilluinnarput. Qularinngilara timmisartuutileqatigiiffimmut, nunamut timmisartunillu soqutigisaqartunut tamanut ulloq puigunaatsuussasoq, oqarpoq.
Josh Cahill taamaasilluni nunatsinnut aappassaat angalasussanngorpoq. Timmisartorsuullu nunatsinnut tikeqqaarneranit ullut marluk nunatsinniinnissani naatsorsuutigaa.
Tuukkaq timmisartunit tamanit nuannarinerpaagaa
Youtubemi ilisimaneqarluartoq Sermitsiaq.AG-mut oqaluttuarpoq Kalaallit Nunaat pinngortitarlu eqqissinarilluinnarlugit. Nunatsinnut pingajussaanik angalassalluni pilersaarusiulereerpoq.
- Nuannarilluinnarpara Kangerlussuup eqqissisimanerujussua, innuttaasullu qanoq inussiarnertigineri. Nuuk illoqarfiit pingaarnersaasoq mikisunnguugaluarluni immikkuullarilluinnartumik tillerneqarpoq, inooriaatsillu assigiinngilluinnartut aamma ataatsimoorfigaat. Uanga Asiami illoqarfissuarmeersuullunga, Kalaallit Nunaat tarnima eqqissinarilluinnarpaa, Josh Cahill nunatsinneeqqaarnini pillugu oqaluttuarpoq.
- Maanna angalareeruma Kalaallit Nunaannukaqqissaanga kingorna. Ilami Airbus A330-800-p saniatigut nuna allarpassuarnik misigisassaqartitsisinnaavoq, oqarpoq.
Taanna ilisimatitsivoq Airbus A330-800-p assigi inuit nittartakkakkut attaveqatigiiffiitigut saqqummiunneqartillugit suli malinnaasuminit ilisimatinneqartarluni. Timmisartoq taama ittoq Josh Cahillip nuannarinerpaasaraa.