Youtubemi ilisimaneqartoq: Norsap paarlattaa Kalaallit Nunaannukarpat ilaarusuttoq
Josh Cahill silaannakkut angallanneq pillugu ilanngutassiortartoq, mailikkut akissutisiniarluni Sri Lankamit Nuummut angalanini videoliaraa.
Youtubemi ilisimaneqartoq Josh Cahill meeraanerminiilli Kalaallit Nunaat soqutigilersimavaa.
Taamaammat qanittukkut Nuummut angalagami takorluugaa piviusunngorpoq. Tamannalu pillugu Youtubemi videomik maanna 100.000-t missaanni takuneqarsimasumik saqqummersitaqarpoq.
Josh Cahill timmisartunik soqutiginninni pillugu ilisimaneqarpoq.
Taamaammat Sri Lankamit Nuummut angalanerata videomi aallaaviunera tupinnarpallaanngilaq.
Timmisartuni nuannarinerpaasaa
Josh Cahillip timmisartuni nuannarinerpaasaa tassaavoq Airbus A330-800 Neo. Timmisartoq taamaattoq Air Greenlandip pisiarinikuuaa, ukiullu naalernerani siullermeerluni atulertussaavaa. Air Greenlandip timmisartorsua Norsaq Airbus A330-800 Neomit taarserneqassaaq.
Tassungalu atatillugu Josh Cahill, Air Greenlandimi attaveqaqatigiinnermut pisortamut, Katja Vahlimut mailikkut allappoq. Kisianni akineqannginnami attaveqarfiginiarlugu Kalaallit Nunaannut angalaniarluni aalajangerpoq.
Josh Cahill sianiinnarsimasinnaagaluarpoq, kisianni angalanerup imminut akilerluarnera qularnanngilaq. Youtubemi nunarsuaq tamakkerlugu ilisarisimaneqartoq, Norsap taartaa Nunatsinnut tikilerpat ilaatinneqarnissaminut neriorsorneqarpoq.
Video tamaat uani takusinnaavat.