WWF: Pikialasorsuarmi uuliasiortoqannginnissaa pingaaruteqarpoq

Pikialasorsuami uuliasiortoqartariaqanngilaq.

WWF Verdensnaturfonden - Nunarsuatsinni Pinngortiamik Illersuiniaqatigiiffik - taamatut oqariartuuteqarpoq.

Illersuiniaqatigiiffiup nalunaarusiani saqqummersippaa, tassani Baffinip kangerliumarngata avannarpasinnerusortaani, Qaanaap Canadamilu Ellesmere Islandip akornanni sikoqannginnersaq Pikialasorsuaq pillugu nalunaarusiaavoq.

Pikialasorsuaq piniarfigineqartarlunilu, takornariartitsisartunit ilisimatusartunillu angallavigineqartarpoq, uuliasiornerilli, umiarsuit allanik aqqutissarsiornerisigut silallu pissusaata allanngorneratigut annertuumik allanngorrartitsisoqarsinnaavoq nutaanillu aarlerinartoqalerluni, taamaattumik iliuuseqartoqarnissaa pisariaqarluni, illersuiniaqatigiiffimmit oqaatigineqarpoq.

- Aarrit, puisit, nannut, qilalukkat qaqortat qernertallu kiisalu arfiviit, nunarsuatsinni qilanngat, appaliarsuit appallu amerlassusaasa marluk pingasorarterutaat ilagalugit upernaakkut Pilialassuaq ornigartarpaat. Pikialasorsuaq piniartunut pingaarutilimmik inissisimasuuvoq, uuliasiortoqassappallu ajoqquseerujussuartoqarsinnaavoq. Namminersorlutik Oqartussanit qulakkeerneqartariaqarpoq tassani uuliasiortoqannginnissaaq.

WWF-imi allaffissornikkut pisortaq Gitte Seeberg oqarpoq.

Silaannaap allanngoriartornera
Nalunaarusiaq ullumi pingasunngornermi saqqummiunneqassaaq. Silaannaap kissatsikkiartorneranit eqqorneqartoq aamma nalunaarusiami atuarneqarsinnaavoq. Siunissami malunnaatilimmik eqqorneqartussaasoq ilaatigut allaaserineqarpoq, Pikialasorsuullu nalaa silaannaap kissatsikkiartorneranit allanngoriartorneranut atatillugu unammillersinnaassusaa appasittutut oqaatigineqarpoq.

Nalunaarusiami uppernarsarneqarpoq, silap allanngoriartornera ilutigalugu upernaakkut planktoninik quajaatinillu Pikialasorsuup pinngorarfigineqapallattarnera sunnerneqassasoq, tamannalu uumasoqatigiiaanut pioreersunut annertuumik sunniuteqassasoq.

Nalunaarusiaq talerpiata tungaani aaneqarsinnaavoq