WWF: Kalaallit Nunaat aqqutissiuussivoq

Ilulissat eqqaanni erngup nukinganik nukissiorfiup nutaap ammarneratigut Nunatsinni pisortat innaallagissamik kiammillu tunisassiornerisa 70 procentia nukissamik ataavartumik tunngaveqalerpoq. Erngup nukingata atulerneratigut uuliamik ukiumut 9 millioner liiterimik atuisarneq taarserneqarpoq, Nunatsinnilu erngup nukinganik nukissiorfiit tallimat ukiumut tamaasa inuiaqatigiit CO2-mik 174.200 tons-inik aniatitsinissaraluat pinngitsoortittarpaat.
Ineriartornerlu pitsaalluinnarpoq, WWF Verdensnaturfonden allappoq.
Aamma atuaruk: Assit: Aana Nunatta erngup nukinganik nukissiorfittaava
– Kalaallit Nunaat nunat ilagaat silap pissusiata allanngoriartorneranik eqqorneqarnerpaat. Taamaattumik tunngavissaqarpoq nersornarlunilu nuna taamatut nukissamut mingutsitsinngitsumut nuunniarmat. Tamanna maligassiuineruvoq nunarsuarmilu nunanut allanut tamanut maligassiuisuusariaqarluni nunarsuup kiatsikkiartornerata killilersimaarnissaanut suli annertunerusumik iliuuseqarnissaannut, Gitte Seeberg oqarpoq.
– Tupinnaqaaq Kalaallit Nunaanni pisortat nukissamik mingutsitsinngitsumik tunisassiornerat maanna taama annertutigilermat. Tamatuma takutippaa kalaallit poltiikeriisa silap pissusia pingaartiinnanngikkaat, aammattaarli mingutsitsinngitsumut allanngortitsinerup iluanaarutissartaqarnera pingaartikkaat, taanna nangilluni oqarpoq.
Gitte Seebergilli ernumanartoqartippaa kalaallit politikerit aatsitassarsioqatigiiffinnut nunatta pisuussutaanik atuiniartunut nukissamik mingutsitsinngitsumik atuinissamik ersarissunik aalajangersimasunillu piumasaqaateqanngimmata.
Aatsitassarsioqatigiiffiit arlallit Nunatsinni piiaaffimmik ammaaniartut nukissaq qangatoortoq mingutsitsisoq, CO2-mik aniatitsisorujussuaq, atorniarpaat.
Taamaattumik WWF Verdensnaturfonden periusissamik ujartuivoq, Kalaallit Nunaanni suliffissuaqarfinni nutaanik ineriartortitsinermi nukissaq mingutsitsinngitsoq qanoq isilluni atortinniarneqassanersoq.