pisassiissutit

WWF-ip isornartorsiuineranut piniartut akissuteqarput

Ilisimatuut uumasut amerlassusaannik naliliineri kisiisa tatigineqassanngillat, KNAPK taama isumaqarpoq

KNAPK-mi siulittaasoq Henrik Sandgreen

Qilalukkat qernertanik aamma aarrinik piniarneq, pisassiissutit biologinit siunnersuutigineqartunik qaangiineri pissutigalugit, piujuaannartitsinermik tunngaveqarunnaartoq, Pinngortitaq pillugu nunarsuaq tamakkerlugu illersuiniaqatigiiffiup WWF-ip pingasunngornermi isornartorsiorpaa.

Illersuiniaqatigiiffillu tassunga tunngatillugu Pinngortitaleriffiup aamma CITES-ip paasissutissaataanut innersuussipput.

Atuaruk: Nunarput qilalukkanik aarrinillu piniarnerminut isornartorsiorneqartoq

Ajorpallaanngitsoq
Ilisimatuut naliliinerattut taama uumasut ulorianartorsiortiginngitsut, aalisartut piniartullu kattuffiat KNAPK naqissusiivoq.

Kattuffiup siulittaasuata, Henrik Sandgreenip, piniartut aalisartullu qilalukkat qernertat aarrillu pillugit ilisimasaat ilaatigut 2009-mili nalunaarsorneqalernikuusut aamma oqaatigaa.

Kisitsinerinnaanngitsut
- Biologit kisitsineri ukiut marlukkaarlutik pingasukkaarlutilluunniit ingerlasut Kitsissuarsunni Qaanaamilu piniartut qaammatit pingasukkaarlutik, piniakkat uumasullu aaliangersimasut takusatik nalilersortarpaat, ilaatigut qilalukkat qernertat qaqortallu, aammalu aarrit. Arlaannaasaluunniit taakku ikileriarnerinik oqariartuuteqanngillat, Henrik Sandgreen tusagassiuutinut nalunaarummi naqissusiivoq.

Tamannalu naliliinerni assigiinngissut WWF-ip tusaaniartariaqarpaa - ilisimatuut kisiisa tusaaniaannarnagit.

- Nunat tamat akornanni aqutsineq pillugu suleqatigiiffiit, kattuffiillu WWF-itut ittut, atuisut ilisimasaat qiviannguarnagit, ilisimatuullu suleqatigiiffii matoqqasut naliliineri kisiisa aallavigalugit inerniliisarnerat KNAPK-miit arlaleriarluta uparuarsimavarput naliliinerillu sunnerniartarsimallutigit, ilaatigut atuisut ilisimasaat tamaniittoq takussutissinniartarlugu, KNAPK-mi siulittaasoq ilanngullugu oqarpoq.

Kalaallit Nunaata taakkunannga ingerlatsinera inatsisit malillugit pisoq, taassuma aamma tikkuarpaa.

Powered by Labrador CMS