suleqatigiinneq

WWF-ip allaffissornikkut pisortaa isornartorsiorneqarnertik paasilluarsinnaavaa

Aalisartut piniartullu kattuffiata isornartumik apeqqutai WWF verdensnaturfonden Danmarkimit akissuteqarfigineqarput

WWF-ip Danmarkimi immikkoortortaqarfiani allaffissornikkut pisortaq, Gitte Seeberg

- Kalaallit Nunaanni aalisartarneq pillugu WWF-ip immikkoortortaqarfiisa nunani allaniittut eqqunngitsumik nalunaaruteqarsimanerat ilumoorpoq.

WWF Verdensnaturfondenimi allaffissornikkut pisortaq KNAPK-mut akissuteqaanni taama aallartippaa.

WWF-ip immikkoortortaqarfiinit assigiinngitsunit assigiinngitsunik isummersortoqartarsimanera pillugu aallartippoq.

- WWF-ip immikkoortortaqarfii assigiinngitsut Kalaallit Nunaanni isornartorsiuinerat pissusissamisuunngilaq, taamaattumik KNAPK-mik Royal Greenlandimiillu suleqateqarnikkut ajornartorsiutigineqartut iluarsineqarput, allappoq.

WWF-ip nunarsuatsinni immikkoortortaqarfiisa ilaanni ilaatigut isornartorsiuisarput aalisakkat Kalaallit Nunaanni aalisarneqartut nungukkiartortuusut, tamannalu Danmarkimi immikkoortortaqarfianit eqqunngitsuusoq nalunaarutigineqartareerpoq.

Immikkoortortaqarfiit ilaat aqukkuminaattarsimasut Gitte Seebergip nassuerutigaa. Kalaallit Nunaanni aalisarneqartartut pillugit nunanit allanit oqaaseqartoqannginnerani Danmarkimi immikkoortortaqarfimmit takuneqaqqaartalernissaat aamma oqaatigaa.

Immikkoortortaqarfinnut allakkamik nassiussisoqassaaq
- Nunani aalisarneq pillugu politikkimik sammisaqarfiusuni allaffissornikkut pisortaasut tamarmik allagaqarfigissavakka. Kalaallit Nunaata imartaani aalisarnermut tunngatillugu WWF Danmarkimut ataqatigiissaarisoqartannginnera akuerineqarsinnaanngitsoq erseqqissaatigissavara, Gitte Seeberg oqarpoq. Barentshavemi aalisarnerit pillugit eqqunngitsumik WWF pitsaanngitsumik attaveqartarsimasoq utoqqatsissutigaa, taamatummi pisoqarnera aalisakkanik suliaqartuusut eqqorneqartarput.

KNAPK-p suliniutai amerlanerpaartaat WWF-imit isumaqatigineqartuusut naggasiullugu allappoq, tassani puisit pillugit nalunaarusiaq eqqartorpaa. Nalunaarusiaq WWF tamaat sinnerlugu suliarineqarpoq Nunatsinnilu puisinniartarneq akuerineqarluni.

Powered by Labrador CMS