Skip to main content

WWF: Appat eqqissisimatilluinnarnissaat pisariaqarpoq

Siunissamissaaq Kalaallit Nunaanni appaqassappat appat eqqissisimatikkallarnissaat pisariaqarpoq, WWF Verdensnaturfonden oqarpoq

Pinngortitaleriffimmi biologit sisamanngormat inassutigaat Kalaallit Nunaanni appat eqqissisimatilluinnarneqalissasut.
Tamatumunnga pissutaavoq sumiiffiit ilaanni appat 70 procenti sinnerlugu ikileriarsimammata nungutaanissaminnullu ulorianartorsiorlutik.
Biologit inassutigaat ukiyuni qulini appat eqqissisimatilluinnarneqassasut, aalisartulli piniartullu kattuffianni KNAPK-mi siulittaasup Henrik Sandgreenip siunnersuut ilalernartinngilaa, innersuussutigalugu siunissami kukkukuuarartuinnarnissaq naammanngitsoq.
Eqqissisimatitsilluinnarnissaq pisariaqarpoq
Henrik Sandgreenip ernumanartoqartitsinera WWF Verdensnaturfondenip paasisinnaavaa erseqqissaallunini eqqissisimatitsilluinnarnissaq pisariaqartoq, siunissami - ukiunullu marlussuinnaanngitsunut - Kalaallit Nunaanni appatortoqarsinnaassappat.
– Qitornavut ernuttavullu eqqarsaatigisariaqarpavut. Tamakkua appat ilikkassappatigit takusinnaasarput malillugu eqqissisimatitsilluinnarnissaq aqqutissatuaavoq. Allat tamarmik piffissamut sivikitsuinnarmut isiginiarnerussapput ajoraluartumillu kinguneqassagunarluni Kalaallit Nunaata appaarulluinnarneranik, WWF Verdensnaturfondenip Issittumut sulisuannit biologi Eva Garde Sermitsiaq.AG-mut oqarpoq.
Atuaruk: "Appat eqqissisimatinneqarnissaat KNAPK-p ilalinngilaa"
Atuaruk: Bloggertartoq: Taamaattumik appat nungulerput"
Atuaruk: "Appat eqqissisimatilluinnarneqarnissaat biologit inassutigaat"
Appat ikileriarujussuarsimanerat pingaartumik ernumanartoqarpoq pissutigalugu appat - assersuutigalugu aqissut taamaanngitsut - kigaatsumik piaqqiortarmata kinguaariit sivisuumik atasarlutik, tassa imaappoq, kigaatsuinnarmik amerliartoqqilertarlutik, WWF Verdensnaturefonden tikkuaavoq.
Kalaallit Nunaanni appat ikileriarnerannut pissutaavoq unioqqutitsinngitsumik unioqqutitsisumillu appanniartarnerit manniinillu katersuisarnerit., aammattaarli silap pissusiata allanngoriartornera piaqqiornerullu nalaani appaqarfiit akornusersorneqartarnerat pissutaaqataapput.
Politikerit akisussaaffik tigussavaat
– Neriuppugut politikerit appanut akisussaaffeqarusussasut biologillu inassuteqaataat maleqqissaarlugit, taamaasilluni siunissami kinguaariit aamma appat nungusarneqanngitsut iluaqutigisarniassammatigit, Eva Garde oqarpoq nangillunilu:
– Tassami qaqqat appaqarfiit appaaruppata, soorlu 1990-ikkut aallartinnerannit manna tikillugu qaqqat appaqarfiit tallimat appaarussimasut, ilimanartoqanngilaq appat uteqqissasut. Taamaattumik nungusaannginnissamut tamatta akisussaafffeqarpugut.
Appat kisimik Nunatsinni ikiliartunngillat. Aamma mitit, taateraat imeqqutaallallu annertuumik ikileriarsimapput.
Tusarniaanerup kingorna Naalakkersuisut isummissapput
Naalakkersuisut naggataatigut aalajangiisuussapput appat eqqissisimatilluinnarneqassanersut.
Aalisarnermut, Piniarnermut Nunalerinermullu Naalakkersuisoqarfik kattuffinnut kommuninullu attuumassutilinnut maanna tusarniaalerpoq, eqqissisimatitsilluinnarnissamik isummertoqannginnerani.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER