WOW Airimik pilersitsisoq nassuerpoq
Sapaatip-akunnerata siuliani Islandimi timmisartortitseqatigiiffiup akikitsup WOW Airip, ingerlatseqatigiiffiup sooq ajutoorneranik pilersitsisua maanna nassuiaateqarpoq.
Skúli Mogensen timmisartortitseqatigiiffeqareernermi kingorna 200 millionit koruuninik piitsuunerulerpoq, taanna 2011-imi ukiakkut ingerlalluariarluni tassanngaannaq marsip 29-anni akiliisinnaajunnaarpoq.
- Ilaasut 10 millioninit amerlanerusut angallappagut aamma Islandimut 2 millioninit amerlanerusunik takornariartitsilluta. WOW Air suliffissarpassuarnik pilersitsisimavoq. Ingerlatseqatigiiffimmiinnaanngitsoq, aammali takornariaqarnermik sulialinnut, Skúli Mogensen, Islandimi tusagassiorfik Iceland Monitor naapertorlugu taama oqarpoq.
Akiliisinnaajunnaarnerup pinngitsoortinneqarsinnaanera taassuma ilimagisimagaluarpaa.
Aalajangiinini inuunermini atortariaqarai
- Inuunerma sinnerani aalajangernikka taakku atortariaqassavakka. Kisianni sulisunut suliffeqarfimmik annaassiniaqataallutik uannut ilungersoqatiginnittunut iluatsitsinnginnera ajornerpaavoq, Skúli Mogensen oqaluttuarpoq.
Ingerlatseqatigiiffik 2015-imi aamma 2016-imi taamani sinneqartooruteqarmat ileqqaarsimasussaagaluarpoq, akerlianik timmisartunut aningaasaliinani. Aallaqqaammut suliffeqarfiup akikitsuuneranik iluatsitsiffiusumik allamut sanguneq aamma kukkuneruvoq.