Wistoft: Neqeroorutit pingasut naammaginanngillat
Kalaallit Airportsimi pisortaaneq, Peter Wistoft, Nuummi aamma Ilulissani mittarfinnik sanaartornissamut neqerooruteqarnissamut sanaartugassanik suliarinnittartut piukkuneqarsimasunit arfiniliusunit pingasuinnaat neqeroorusiorsimanerat naammaginartinngilluinnarpaa.
- Suliap ingerlanneqarnerata sivisoorujussuusimanera nassuerutigisariaqarparput, minnernngitsumik politikkikkut pisut aamma erseqqissaannginneq pissutigalugu. Ingerlatseqatigiiffiit arlallit suliamik ingerlatsiinnarnissamik ajornakusoortitsinerannik tamanna kinguneqarpoq, Peter Wistoft, Sermitsiaq.AG-mut taama oqarpoq.
- Neqeroorutit pingasuinnaat pissarsiarineqarnerat naammaginanngilaq, Peter Wistoft naqissusiivoq.
Aallartinnissaq neriorsuutigigaa
Suliffeqarfissuit sanaartugassanik suliaqartartut Danmarkimeersut, Hollandimeersut aamma Canadameersut, aningaasartuutissanut naatsorsorneqarsimasunut Kalaallit Airportsip missingersuusiaanut qanittumik inissisimasumik neqerooruteqarsimapput.
- Neqeroorutit naatsorsuutigisat iluanniinnerat oqaatigisinnaavara, taamaalilluta qularnanngitsumik ukiaru sanaartorneq aallartissinnaassavarput, mittarfinnik ingerlatseqatigiiffiup pisortaa oqarpoq.
Piffissamut pilersaarummut allamut periarfissaq
Ingerlatseqatigiiffiit piffissamut pilersaarummik allamik siunnersuuteqarnissamut pisinnaatitaaffitsik atorsimavaat, kisianni mittarfiit qaqugu piareernissaannut minnerusumik kingusinaarnissamik tamanna naggataagut isumaqasaaq. Kissaatigineqartumit qaammatit marluinnaat nikingassutaassasut, Peter Wistoftip nalilerpaa.
Mittarfiit taakku marluk kittaartumik sanaartorneqarnissaannik siunniussisoqarsimasoq isumaqartoqarsimassappat kukkunerusoq, taanna nassuiaavoq, tamatuma aappaa annertuumik kinguaattoortissagaluarpaa.
Aalajangiineq
Kalaallit Airportsip siulersuisui juunip 25-anni ataatsimiissapput, tassani neqeroorutit aalajangiiffigineqassapput, taakku maanna misissoqqissaarneqarput. Juunip 25-ata aamma juulip sisamaata akornanni ingerlatseqatigiiffiup sorliup suliassaq pissarsiarineraa saqqummiunneqassasoq naatsorsuutigineqarpoq.