WHO-p pisortaanera: Corona suli sivisunerusumik maaneeqqaarallassaaq
Corona suli sivisunerusumik maaneeqqaarallassaaq. Nunat amerlanerpaartaat coronap tunillaassornerata aatsaat aallartilaarneraniipput, WHO-mi pisortaaneq oqarpoq. Taassuma takusinnaavaa Europap kitaani pitsanngoriarneqartoq.
Coronavirus piffissami qaninnermi tunillaassorunnaarnavianngilaq. Tunillaassornerlu annertuneruleqqeriaannaavoq.
Nunat tamalaat peqqissutsimut suleqatigiiffiata, WHO-p pisortaanera, Tedros Adhanom Ghebreyesusip pingasunngornermi tusagassiortunut ilisimatitsinermini oqaatigaa.
- Kukkuniaqinasi: suli aqqutissarput takeqaaq. Virusip uuma sivisungaatsiartumik ingiaqatigissavaatigut, oqarpoq.
- Nunat amerlanerpaartaat nappaalasoqarneranik nalaataminni aatsaat aallartilaarput. Siulliullutillu nappaalasoqalersimasut qaangiileraluartulli ilaat, maanna nappaalasoqarneruleriartoqqipput, oqarpoq nunanilli taasaqarnani.
Nunarsuarmi tamarmi virusimut illersorniarnermi ilaatigut putoqartoqarpoq, nunallu arlaannaalluunniit tunillaassortoqanngitsuuvinnissamut illersuutissaqanngilaq.
Europap kitaani takuneqarsinnaavoq coronamik tunillaassorneq aalaakkaasoq annikilliartortorluunniit. Nunarsuup sinnerani pissutsit taama taaneqarsinnaanngillaq, Tedros oqarpoq.
- Kisitsisit annikikkaluartut, Afrikami, Amerikap qeqqani kujataanilu kiisalu Europap kangiani ernumanartumik amerliartortoqartoq takusinnaavarput, WHO-mi pisortaaneq oqarpoq.
Johns Hopkins Universityp nalunaarsuinera naapertorlugu nunarsuaq tamakkerlugu nappaalanerminni toqusut pingasunngornermi 182.000-it qaangersimalerpai.