WHO-p coronavirus nunarsuaq tamakkerlugu tuniluuttutut maanna nalilerpaa
Coronavirusimik tunillaassuunneq ima siaruaassimatigaaq, nappaatitut nunarsuaq tamakkerlugu tunillaassuuttutut nalunaarsorneqartariaqalerpoq, Naalagaaffiit Peqatigiit nunani tamalaani peqqinnissakkut suleqatigiiffia taama ilisimatitsivoq.
Coronavirusip tuniluunnera nunarsuaq tamakkerlugu tuniluuttutut maanna oqaatigineqarsinnaanngorpoq. WHO-p generaldirektøria, Tedros Adhanom Ghebreyesus, Reuters naapertorlugu taama oqarpoq.
Pandemi tassaavoq nunarsuaq tamakkerlugu tunillaassuunneq.
- Pandemi oqaasiuvoq mianersuullugu atugassaq. Oqaaseq taanna atornerlullugu taaneqassappat annilaanganermik kinguneqarsinnaavoq, pissutissaqanngitsumillu tunniutiinnartitsisinnaalluni, taakku kingunerisaannik pisariaqanngitsumik anniartoqarsinnaavoq allaallu toqumik kinguneqarsinnaalluni, generaldirektør oqarpoq.
Generaldirektør ataasinngornermi oqarpoq, tunillaassuunneq annikinnerulersikkuminaassiartortoq.
Tassanili erseqqissarpaa suli kingusinaartoqanngitsoq.
Tunillaassuunneq pandemimik taaneqaraluartoq, taamaattoq suli qanoq iliortoqarsinnaavoq, WHO isumaqarpoq.
- Eqqissilluta pitsaanerpaanik iliorniarpugut, nunarsuup innuttaasui illersorumallugit. Taama iliortoqarsinnaavoq.
- Tunillaassuunneq pandemitut taaneqartaleraluartoq coronavirus pillugu aarlerinartup nalilersorneqarsimanera WHO-p allangortissanngilaa. WHO-p qanoq iliorneranut allannguissanngilaq, aamma nunat qanoq iliornissaannut allannguisariaqarnani, generaldirektør oqarpoq.
- Ullut tamarluinnaasa kaammattuigut nunat pinasuartumik sakkortuumillu iliuuseqassasut. Aarlerinartup takuneqarnissaa ersarilluinnartumik sulissutigisimavarput, oqarpoq.
Virusip akiornissaanut kikkut tamarmik qanoq iliuuseqarnissaat pingaaruteqartoq, taassuma nalilerpaa.
- Tamat akornanni peqqissutsikkut aarlerinartorsiornerinnaanngilaq. Ajornartorsiut oqartussaasunik tamanik eqquissaaq, inuillu ataasiakkaat tamarmik akiuuteqataasariaqarput, Tedros Ghebreyesus oqarpoq.
WHO naapertorlugu kikkut tamat virusimut illersornissaat pingaaruteqarluinnarpoq. Tunillatsissimasut tamarmik nassaarineqarnissaat, mattunneqarallarnissaat, misissorneqarnissaat pisariaqartunilu nakorsarneqarnissaat pingaaruteqarluinnarpoq. Taassuma kingorna tunillatsissimasup piffissami aalajangersimasumi peqatigisimasai tamarmik misissungassamik tigusiffigineqartariaqarput.
Nunarsuaq tamakkerlugu coronavirusimik tunillatsissimasut 122.000 sinneqarput. Taakkunannga 4.300 sinnillit nappaammik toqquteqarput.
Danmarkimi inuit 442-t coronavirusimit tunillatsissimapput, inuillu 1303-t angerlarsimaffimminni mattusimagallartinneqarlutik.