Skip to main content

Whistleblowerit: Nukissaarussimavugut

Namminersorlutik Oqartussat ingerlatseqatigiiffiutaani naatsorsuusiornermi peqquserluttoqartarsimanera pillugu KNI-mi akisussaasut qularunnaarsinniarneqarnerat sakkortullunilu piffissamik atuiffiusimaqaaq, whistleblowerit pingasut kanngunartuliat qulaajaaffigineqarnerannut pissutaasut oqaluttuarput.

Dorthea Olsen Rasmussen, Anemarie Schmidt Hansen aamma Hans Peter Lynge-Larsen, KNI-mi pissutsit isornartut qulaajaaffigineqarnissaannik oqaaseqartarsimanertik pillugu pimoorunneqarnissamut qaqutigoortumik sorsuuteqangaatsiartariaqarsimapput, sorsuuteqarsimanerat politiinut unnerluutiginninnermik, suliunnaarsitsinermik namminerlu aningaasaatit 112 millioner koruuninik nalikillineqarnerannik kinguneqarallarsimavoq. 

- Kiakkertarneq, qullilisarneq, nappaateqarneq tarnikkullu annertuumik tatineqarneq. Aap, pingasuulluta ullumikkut nukissaarutivissimavugut, taakku pingasuullutik suliaq ukiuni marlunni qaammatinilu arfinilinni maannamut ingerlasimasoq pillugu oqarput.

Dorthea Olsen Rasmussenip erseqqissaassutigaa:

-Immitsinnut tapersersoqatigiissimanngikkutta, qangali uanga susinnaajunnaareersimassagaluarpunga.

Piaaraluni naatsorsuusiornermi peqquserluttoqartartoq

Tamakku eqqarsaatigissagaanni, ingerlatseqatigiiffimmi ukiuni arlalinni naatsorsuusiornermi peqquserluuteqartarsimanerup maanna uppernarsarneqarnera, aamma pisortaanerusimasup kinguaassiuutitigut kannguttaatsuliortarsimasup suliunnaarsinneqarsimanera oqiliallaataasimaqaat.

- Pisariaqanngitsumik suliaq sivisuumik ingerlasimavoq, arlaleriarluta aporfeqartarsimavugut. Tamanna piareersimaffigisimanngilarput. Isumaqarsimagaluarpugummi siulersuisuni siulittaasup Lars Borris Pedersenip unnerluussutigisavut pimoorullugit tigussagai, sivisoorujussuarmilli tamanna ingerlanniarsimavarput, naggataatigullu ingerlatseqatigiiffik politiinut unnerluutigisariaqarlugulu partiini siulittaasut, politikkerit allat Sermitsiarlu  lannguttariaqarsimallutigit, taakku pingasuullutik arnat Peter Grønvold Samuelsenimik politiinut unnerluutiginnissimanerannik nersualaarinnittut oqarput.

- Arnat taakku tamakkiisumik tapersersorpavut, pitsaanngitsumimmi aqutseriaaseqartoqartoq pissaanermillu atornerluisoqartartoq nalunnginnatsigu.

Politikikkut tatineqarneq

Naalakkersuisut Siulittaasuata Múte B. Egedep whistleblowerit ingerlatseqatigiiffimmi saliisoqarnissaa anguniarlugu sapiiserlutik saqqummiussisimanerat qujassuteqarfigaa.

- Mútep nalunaarutaa uagutsinnut annertuumik pingaaruteqarpoq. Sermitsiaq.AG aqqutigalugu KNI-mi aqutsisut inissillugit erseqqissaassutigimmagu, politikkikkut tatisisoqarneratigut siulersuisut arlaannaannulluunniit attuumassuteqanngitsunik misissuititsilersimasut oqaatigimmagu nuannaarutigaarput, taakku oqarput, innersuussutigalugulu Lars Borris Pedersenip novembarip 24-ani KNR-imut oqaaseqarsimanera, tassani erseqqilluinnartumik oqaatigimmagu immikkut misissuisoqarnissaanik pisariaqartitsisoqanngitsoq.

- Siulersuisut Lars Borris Pedersenimik siuttullit tatigiunnaarnerannut tunngavissaqarluarpugut. Taassumami arlaleriarluni pisimasut toqqorterniartarsimavai, taamaaliortarneralu naggataatigut uagutsinnut akisusimaqaaq. Kinguaassiuutitigut kannguttaatsuliortarnerit qangali unitsinneqarsimasinnaagaluarput, Anemarie Schmidt Hansenip 2019-imi februaarip qaammataani unnerluutigisai Lars Borris Pedersenip pimoorullugit tigusimasuuppagit . 

Taakkununnga tupannarsimaqaaq, taamanikkut Naalakkersuisunut siulittaasuusup Kim Kielsenip, Peter Grønvold Samuelseni Air Greenlanip siulersuisuinut ilaasortanngortimmagu, tassa KNI-mi naatsorsuutinik peqquserluuteqartoqarsimanerata misissuiffigineqaleruttornerani.

Suliaq inuttut akisusimaqisoq iperarsinnaaneraat qularnarpoq.

- Sulimi misissuisoqarpoq, eqqartuussivitsigullu aalajangiisoqarnissaat naatsorsuutigaarput. Tamatuma naammassineqarnissaanut piffissaq sivisooq ingerlasinnaavoq. Eqqartuussivitsigut suliaq naammassineqarpat imaassinnaavoq suliaq iperarsinnaanngoripput. Pisussaaffipput maanna naammassisimalerparput, arlaannaannilluunniit eqqartuusserusunnginnatta eqqartuussivitsigut suliaqartoqartarnera nuannaarutigaarput, taakku ataatsimoorlutik oqarput.

Læs hele sagen:

  1. KNI har rod i regnskaberne
  2. KNI fejer regnskabsfusk ind under gulvtæppet
  3. Pustes et lager op påvirker det overskuddet
  4. Uvildig undersøgelse af KNI-sag
  5. Tilliden skal genoprettes
  6. Tatiginninneq pilerseqqinneqassaaq
  7. Sådan blev KNI-regnskab manipuleret
  8. KNI-mi siulersuisut politiit paasiniaanerat utaqqeqqaarniarpaat
  9. KNI-bestyrelse vil afvente politiets efterforskning
  10. KNI ramt af corona-restriktioner
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER