Welcome to Colourful Nuuk
Tusagassiivik Sermitsiaq.AG aviisimik nutaamik saqqummersitsilerpoq. Nuummi takornarianut tulluarsakkamik aviisimik tuluttut oqaatsit atorlugit sapaatip akunnerata tulliani saqqummertoqassaaq
Nuummi pisiniarfiutillit qanoq takornarianut attaveqarnissartik unamminartittarpaat. Tamanna iliuuseqarfigineqarpoq.
Suliffeqarfippassuit nittartakkatigut, soorlu Facebookikkut Instagramikkullu, saaffissaasinnaasunik ujartuisarput, tamanna suliffeqarfinnut unamminartuusinnaasarpoq, tassami takornariat akunnerni amerlanngitsuni ulluniluunniit arlaqanngitsuni illoqarfimmiittarmata.
Takornarianut attaveqarniarnerup pitsaanerulernissaa anguniarlugu Tusagassiivik Sermitsiaq.AG aviisimik tulluttut oqaatsit atorlugit akeqanngitsumik saqqummersitsissaaq tallimanngorpat tulliani. Aviisi Sikukip eqqaani tikittarfimmi takornarianit tiguneqariaannaassaaq. Takornariat 16.500 missaanniittut Nuuk qaammatini tulliuttuni tikeraassagaat naatsorsuutigineqarpoq.
- Nuummi pisiniarfiit aviisimi saqqumilaartinneqassapput, aamma illoqarfiup oqaluttuassartaa atuarneqarsinnaassalluni, Sermitsiaq.AG-mi pisortaaneq Christian Schultz-Lorentzen oqarpoq. Aappaagu nuna tamakkerlugu siammarterneqartussamik saqqummersitsisoqarumaartoq ilisimatitsissutigaa.
Illoqarfimmit neqeroorutit saniatigut Nuup illoqarfiata assinga takuneqarsinnaassaaq, pisiniarfiit sumi inissisimanersut nalunaarsorneqassallutik.
- Umiarsuarnut takornariartaatinut Nuummukartussanut digitalikkut aviisimik saqqummertoqarnissaa sulissutigineqarpoq. Tamanna suliaq unittooqqagallarpoq, taamaattoq umiarsuit tikinnginnerini aviisi tigoriaannanngorlugu umiarsuarmiilernissaat sulissutaavoq, Tusagassiivik Sermitsiaq.AG-mi tuniniaanermi pisortaq Hans Pavia Petersen oqarpoq.
Takornarianut aviisi siullerpaaq Tusagassiivik Sermitsiaq.AG-mit saqqummersinneqassaaq. Aviisi 6.000-nngorlugu naqiterneqassalluni.