WEIO-mi medalje-nattaarpassuit

Ersaartaanneq nipittoraluttuinnarpoq Tim Field, Anchorage-meersoq, High Kick-imi qummut isimmitseriassalluni arpalersoqqimmat. Isikkaminik isimmitseriarpoq arsarlu puisip amianik sanaaq attuallalaarlugu - naammattumilli, taamaasillunilu isimmitseriarnermi nunarsuarmi nutaamik rekordiliivoq 297,2 centimeterinik portussusilimmiittumik isimmitsilluni.
Aamma atuaruk: OL-imi pinnersut
Nuannattoqarpoq eqitaartoqarlunilu, kinguninngualu medalje-nattut ajugaasut qaqisarfianni medalje-natsinneqarput. Unamminermi tamatumani kalaaleq Pilo Rasmussen bronze-nappoq, 266,7 centimeterimik portussusilimmiittumik isimmitsigami.
World Eskimo-Indian Olympics-imi (WEIO), Alaskami Fairbanksimi ingerlanneqartumi, arfininngormallu unnuap qeqqata missaani naammassineqartumi, Kalaallit Nunaat qulinik medalje-nappoq.
Unammiffinni assigiinngitsorpassuarni medalje-nattoqarpoq, ilaatigut pakassumminnermi sølvi bronze-lu pissarsiarineqarlutik, tassani kalaallini angusarissaartuullutik Aputsiaq Høy aamma Mikkel Andersen. Tamatuma saniatigut Suanne Nielsen aamma Helga Nielsen medalje-napput.
Ukioq mannali angusarissaarnersaavoq Mikkel Andersen, unammissummi ´Drop the Bomb´-imi qasusueqaluni nukittoqalunilu ajugaagami.
Naammagisimaarinnipput
Unammiuaarnerup naajartulernerani kalaallit peqataasut naammagisimaarinnilluarput angusarissaarluarnertik pissutigalugu.
– Ajugaanera tulluusimaarutigisorujussuuvara - ukiup kingulliup missaani sungiusartarsimaqaanga suliffinnit soraaraangama ullut tamangajaasa, kuultinnattoq bronze-nattortlu Mikkel Andersen, ulluinnarni Ilulissani sanasutut sulisoq, oqarpoq.
Helga Nielsen, ukioq manna piingajussaa WEIO-mi peqataasoq, oqarpoq:
– Siullermeersumik aatsaat taama amerlatigisut Kalaallit Nunaannit peqataapput, taamaattumik soorunami taama amerlatigisunik medalje-nalluni nuanneqaaq. Neriuppunga aappaagu angusarissaarnerussalluta - tamannalu peqatigalugu unammiuaarneq samminerulersillugu.