Wangenheim: Oqaaseqartartut ataatsimoortilersigit
Pisinnaatitaaffiit pillugit sullissivinni oqaaseqartartut ataatsimoortinneqalernissaannut Naalakkersuisut siulii siunnersuuteqareersullu, oqaaseqartartut arlallit, tassa inuit innarluutillit oqaaseqartartuat aamma utoqqaat oqaaseqartartuat, tunuarniuteqarsimagaluartut, taamaattoq Demokraatineersup Anna Wangenheimip paaserusuppaa siunnersuut Naalakkersuisut nutaat sooq tunuartinneraat.
Inuit pisinnaatitaaffii pillugit kommissionimik pilersitsilluni pisinnaatitaaffiit pillugit sullissiviit oqaaseqartartuuteqartut ataatsimoortinneqalernissaannut siunnersuut siorna saqqummiunneqarmat illersuisunit, oqaaseqartartunit siunnersuisoqatigiinnillu isornartorsiorneqangaatsiarpoq, tassami suliami peqataatinneqarnissaq kissaatigineqarmat.
Pineqartut peqataatinneqarnissaq amigaatigaat, ernumagalugulu aningaasat ikinnerusut atorlugit suliat suli taama annertutigisut tunniuttariaqartassallugit. Inuit innarluutillit Illersuisorisaat Christina Johnsen taamani oqarpoq illersuisut ulloq unnuarlu ataannartumik sulisinnaanngitsut.
Isornartorsiuisoqaraluartorli, taamaattoq Demokraatineersoq Anna Wangenheim isumaqarpoq allaffissorneq taamaaliornikkut annikillineqarsinnaasoq. Taamaammat paaserusuppaa suliaq Naalakkersuisut sooq uninngatiinnarneraat.
- Partiit assigiinngitsut tusartuarpavut, pisortat allaffeqarfiata annikillilerneratigut aningaasanik sipaarnissamik kissaateqartut. Uanga Demokraatillu isuma taanna assut isumaqatigaarput. Taamaattumik uissuumminarpoq, Naalakkersuisut tungaanniit pisortat allaffeqarfiat annertuserusunneqarmat utoqqaat oqaaseqartartuata immikkut allattoqarfeqalerneratigut, Anna Wangenheim paragraf 37 atorlugu Naalakkersuisunut apeqquteqarnermini tunngavilersuutimini allappoq.
Utoqqaat illersuisuata allattoqarfeqalernissaa pillugu Naalakkersuisut tusarniuteqaqqammerput. Utoqqaat illersuisuat Naalakkersuisunit 800.000 koruuninik aningaasaliiffigineqartarpoq. Naalakkersuisullu pilersaaruteqarput allattoqarfiup pilersinnissaanut atorfinitsitsinissamullu aningaasaliissutit 1 millionit koruuninik ilaniarlugit.
Nutaaliorneq amigaataavoq
Allaffissorneq akisummat Anna Wangenheimip paaserusuppaa Naalakkersuisut aqqutissanik nutaanik sooq eqqarsaateqannginnersut.
- Akerlerinngilluinnarparput, utoqqaat oqaaseqartartuata allattoqarfimmik pisariaqartitsinera. Soorunami Utoqqaat oqaaseqartartuat allaffimmioqarnissamik kissaateqarsimavoq. Kisiannili sooq iluatsillugu nutaaliortoqaruni eqaallisaallunilu, taamaasilluta allaffeqarfimmut aningaasartuutit annikillissammata akerlianillu aningaasat sipaarneqartut utoqqarnut pisariaqartumik pitsanngorsaatitut atorlugit?
Illersuisoqarfiit allattoqarfii eqaannerusumik atornissaanut nutaanik misissuisoqarnissaa inissaminiittoq, Demokraatit isumaqarput.
- Taassumami kingunerissammaguttaaq, allattoqarfiit suleqatigiissinnaanerat, isummersoqatigiissinnaanerat ullumikkumiit annertunerujussuarmik, aammalu takorloorneqarsinnaavoq, allaffinnut assigisaannullu sipaartoqarsinnaasoq.
Naalakkersuisuusimasut siunnersuuteqareertullu illersuisoqarfiit peqataatinneqannginnermut ernumanerat pillugu, siunnersuut unitsikkallarsimavaat.