Wangenheim: Naartuersinnerni angutit atuuffiinik ujartuisoq

Naartunerit affaasa missingisa kissaatigineqannginnerinut pissutaasut pillugit ilisimasakippallaarpugut, Anna Wangenheim oqarpoq. Kalaallit Nunaanni naartuersittartut sooq taama amerlatiginerannik misissuisoqarnissaa siunnersuutigaa.

Anna Wangenheimip kissaatigaa, sooq arnat taama amerlatigisut naartuersittarnerat misissorneqassasoq. Tamatuma peqatigisaanikkissaatiginngissamik naartulernertarnerpassuarni angutit atuuffiinik misissuisitsiniarpoq.

- Erninerit amerlaqatipajaavinik naartuersittoqartarnera isumaqarpunga innuttaasut peqqissusaanni ajornartorsiuterujussuusoq.

Demokraatit sinnerlugit Inatsisartunut ilaasortaq, peqqissutsimullu naalakkersuisuusimasoq, Anna Wangenheim aviisimut AG-mut oqarpoq.

Taanna ukiakkut ataatsimiinnermi nunatsinni sooq taama amerlatigisut meerartaarumasannginnerannut pissutaasunik misissuisoqarnissaanik siunnersuummut tunuliaqutaavoq. Tamanna innuttaasut katitigaanerisa ineriartornerannut maannamut sanilliullugu sulisussanik amigaateqarfiunerulersussamut utoqqaallu amerlanerujussuanngorfigisassaannut atatillugu aamma unammilligassaasoq tikkuarpaattaaq.

Politikerip erseqqissaasssutigaa, arnat timiminnut aalajangiisussaanerannik killiliiniarnerunngitsoq.

Kisianni Anna Wangenheim isumaqarpoq, Kalaallit Nunaata namminerisaminik naartuersittarnermut inatsiseqalernissaanut piffissanngorsimasoq, inatsit ullumikkut atuuttoq 1975-imeersuummat misissorneqartariaqalersimasinnaammallu.

Tamatumani assersuutigalugu kissaatiginngisamik naartulersimasoqartillugu angutit atuuffigisartagaat pineqarpoq.

- Arnat naartulernissamut illersuuteqarnissaq kisimiillutik akisussaaffigineraat oqallisigisariaqarparput, Anna Wangenheim oqarpoq nangillunilu:

- Angutit eqeersimaarlutik peqataasariaqarput. Kisianni immaqa ukiuni kingulliunerusuni arnat assersuutigalugu ilinniagaqarsimanermut atatillugu siuarsimaffigisorujussuusaanni, angutit peqataatinneqarnissaat puigorsimavarput.

Aviisimi AG-mi allaaserisaq tamaat atuarsinnaavat, Aviisi uani pissarsiariuk:

Powered by Labrador CMS