Wangenheim: Atorfilik akiuussutissalertinniarluni kimigiisersimavoq
Kommuneqarfik Sermersuumi atorfillip ataatsip, atorfillit borgmesterilu akiuussutissalerneqanngippata, kommunip innuttaasut akiuussusersorneqarnerannut ikiuunnera tunuartinniarlugu aarlerisaarisimavoq.
Nuummi innuttaasut juulip 22-ani ullaakkut qulingiluannguinnartoq atuarfiup USK-ip silataani utaqqilereersimapput, neriuutigalugulu nalunaaquttap akunneri tallimat qaangiunneranni akiuussutissalersuineq ammarneqarpat akiuussutissalerneqarnissartik.
Borgmesterili Charlotte Ludvigsen (IA) atorfilittanilu pingasut siallersumi anorlersumilu nalunaaquttap akunnerpassuini utaqqisariaqarsimanngillat.
Charlotte Ludvigsenip ajuusaarutigalugu oqaatigisimavaa, atorfilittat peqatigalugit tulleriaattunit siulliullutik akiuussutissalertissimanertik, borgmesterilli oqaluttuarisimasaanit ajornerusumik pisoqarsimavoq.
Akiuussutissalersuinermut ataqatigiissaarisoq politikkeriusorlu Anna Wangenheim (D) Sermitsiaq.AG-mut taamatut oqarpoq.
Kommuni ikiuunnissamut neqerooruteqarsimasoq
Anna Wangenheimip oqaatigaa, innuttaasut akiuussutissalersorneqarnerannut kommuni ikiuunniarluni neqerooruteqarsimasoq.
Kommuni "sulisussatigut" ikiuiniarluni neqerooruteqarsimavoq kiisalu tulleriaattunik nakkutiginninnissamik aamma akiuussutissat nungunnissaasa tungaanut eqqissisimasumik tulleriiaattoqarnissaanik nakkutiginninniarluni neqerooruteqarsimalluni.
Ikiuunneralli taamaatiinnariaannanngorsimavoq, tassa atorfilittat ilaasa borgmesterillu piumasarimmassuk akiuussutissalersuineq pisortatigoortumik ammartinnagu akiuussutissalerneqarnissartike - innuttaasorpassuit nalunaaquttap akunnerpassuini tulleriaallutik nikorfagaluartut.
- Taakkua oqaatigaat: ”Suleqataanerput maannakkut unitseriaannaavarput" aamma "tulleriaattorpasuit pillugit taamaalilluta ikiorsinnaassanngilatsigit”, skriver Anna Wangenheim nassuiaammini, Sermitsiaq.AG-mit pissarsiarineqarsimasumi atuarneqarsinnaavoq.
Ilungersunartumik inissinneqarsimasoq
Aarlerisaarisoqarmat Anna Wangenheim ilungersunartumik inissisimatinneqalersimavoq:
- Ima paasillugu, inuppassuit silataani utaqqisut, sillimaniarnerlu eqqarsaatigalugu, ullut sioqqullugit ikiuinissaminnut neqerooruteqaraluarnertik atorunnaarsissallugu, sisamaallutik borgmesteri ilanngullugu kapiteqqaanngikkunik. Taannalu ilungersunartorujussuartut tiguara. ajoraluartumillu oqassaanga piffissaq taamatut ingerlareertillugu sukkasuumik qisuariartariaqarsimallunga, Anna Wangenheim oqarpoq, nangaillunilu oqarluni:
- Aalajangigassarlu uaniisimavoq; siulliutissavakka? Taamaasillunga qulakkiisallugu tunuleriiaattut torersumik aaqqiissorneqarsinnaassallugu, imaluunniit ulloq taanna akiuussusersuineq unitsiinartariaqassavara? Taamaasillunga aamma inuppassuit qassit tiimit sinnerlugit utaqqereersimasut akiuussuserneqarnissaminnut periarfissikkunnaarlugit.
- Ajornartoorninni – aalajangerpunga – aaqqiagiinngissuteqarnissaq pinngitsoortinniarlugu akiuussutissalerneqassasut, tassa innuttaasut 600-t allat akiuussutissalertissinnaanerat qulakkeerniarlugu.
Akiuussutissalerneqarnissamik sioorasaarisoqarsimannginneraasut
Anna Wangenheimip pisimasoq kamaatigivaa:
- Naartusut, milutsitsisut pitsorluttullu nalunaaquttap akunnerini arlalinni utaqqilutsinneqarsimapput, pineqartut akiuussutissalertinnissamut naleqqunnerusutut imminnut isiginerat pissutigalugu, taanna allappoq.
Kommuneqarfik Sermersuumit allakkatigut akissuteqarnermi oqaatigineqarpoq, atorfilittat borgmesterilu akiuussusertinniarlugit sioorasaarisoqarsimanngitsoq:
- Ilumoorpoq atorfilittap pineqartup Anna Wangenheimillu ulloq taanna sakkortuumik oqqassimanerat, akiuussutissalersuinerulli aaqqissuunneqarsimaerata kommunimit naammagineqannginnera pissutigalugu suleqatigiinnermit tunuarnissamik sioorasaarisoqarsimasoq matumani pineqarpoq, kommunimi attaveqartarnermut immikoortortamit oqaatigineqarpoq.