Wangenheim sakkutuujunissaq pillugu ersarissumik akissuteqaqqusivoq
Nunatsinni sakkutuunngornissamut misilitsinnerit unitsinneqarnissaannik Naalakkersuisut Illersornissaqarfimmut qinnuiginnippat? Apeqqut taanna Anna Wangenheim akissutissarserusuppaa.
Kalaallit inuusuttut Kalaallit Nunaanni ukioq manna sakkutuunngornissamut misilitsissinnaannginnerannut kina akisussaasuunersoq, naalakkersuisup Pele Brobergip (N) akissutaa Demokraatineersup Anna Wangenheimip naammaginngilluinnarpaa.
Illersornissaqarfiup sakkutuunngornissamut Kalaallit Nunaanni misilitsinnerit unitsikkallarai saqqummernerata kingorna, politikeri arlalinnik apeqquteqarpoq. Misilitsinnerit 2018-imili ingerlanneqartalerput.
Illersornissamut ministeri Trine Bramsen (Soc.) KNR-imut ilisimatitsivoq, Naalakkersuisut piumasaqarnerisa kingorna misilitsinnerit unitsikkallarneqartut, kisianni naalakkersuisoq Pele Broberg avaqqussilluni Anna Wangenheimimut akissuteqarpoq.
Akissut naammaginngikkaa
Anna Wangenheim toqqaannartumik aperivoq:
- Naalakkersuisut misilitsitsinerit taamaatippaat?
Naalakkersuisoq tassunga akissuteqarpoq: ’Naalakkersuisut naalagaaffimmi oqartussanut piginnaatinneqanngillat, Illersornissaqarfik ilanngullugu.’
Akissullu taanna Anna Wangenheimip naammaginngilaa:
- Isumaqarpunga akissuteqanngitsoq, Naalakkersuisullu allamut sangutitsiniartumik akissuteqannginnissamut imaluunniit paasissutissanik saqqummiussinaveersaartussaanatik pisussaaffeqarput, Anna Wangenheim Sermitsiaq.AG-mut oqarpoq.
Apeqqutit nutaat nassiunneqartut
Taamaamma politikeri apeqqutinik nutaanik nassiussivoq, Nunatsinni sakkutuunngornissamut misilitsitsisoqannginneranik kikkut akisussaanersut apeqquteqaqqilluni.
Taanna isumaqarpoq, ’Inatsisartut Inatsisaat Naalakkersuisunut ilaasortat akisussaanerat aalajangersagaqarnera tunngavigalugu pingaaruteqarluinnarpoq Inatsisartunut innuttaasunullu eqqortumik paasissutissiinissaq.’
Maani Nunatsinni sakkutuunngornissamut misilitsinnermut taarsiullugu inuusutut sakkutuunngornissamut Danmarkimut misilitsikkiartornissamut Namminersorlutik Oqartussanit tapiiffigineqarsinnaapput. Anna Wangenheimip taamatut ineriartortoqarnera uggoraa:
- Misilitsitsisarnerit ukiuni kingullerni pisut iluatsilluartorujussuupput. Inuusuttorpassuit sakkutuutut ilinniarneq iluaqutigaat, ilinniarnissamullu neqeroorut pitsaasuuvoq, Anna Wangenheim oqarpoq.
Sermitsiaq.AG-p isornartorsiunermut naalakkersuisoq Pele Broberg oqaaseqartinniaraluarpaa. Kisianni tassani ilinniartitaanermut, kultureqarnermut, timersornermut ilageeqarnermullu naalakkersuisumut innersuussisoqarpoq.