Wangenheim ammaaqqinnissamut pilersaarummik ujartuisoq

Peqqissutsimut Naalakkersuisuusimasoq Anna Wangenheim, inuiaqatigiit nunarsuup sinneranut qanoq ammaqqinneqarsinnaanerannut pilersaaruteqartoqartariaqartoq, suliffeqarfiit tuniluuttoqarneranik eqqugaasimasut innuttaasut peqqissusaat akiginagu aningaasioqqissinnaalerniassammata.

- Eqqarsaatigilluagaanngitsumik ammaaqqinneq suliffeqarfinnut tatineqareersunut kingunerluuteqarujussuassaaq. Ikiorsiissutit naassaanngitsumik ingerlanneqarsinnaanngillat, taamaammat pisariaqarpoq eqqarsaatigilluakkamik ammaaqqinnissamut pilersaarusiortoqarnissaa, tassa suliffeqarfiit innuttaasut peqqissusaat akiginagu aningaasarsioqqinnissamut periarfissaqarniassammata, Anna Wangenheim oqallissaarummi tusagassiorfinnut nassiussimasamini allappoq.

Kikkut salliutinneqassappat?

Taanna ilaatigut isumaqarpoq, vaccinepassimik sanasoqartariaqartoq, assersuutigaalu takornariartitsinermi neriniartarfinnilu sulisut akiuussutissalertinnissamut salliutinneqartariaqartut, taakkunanna inuussutissarsiuteqartut aallarteqqinnissaat eqqarsaatigalugu.

Demokraatit sinnerlugit qinigassanngortittup allattukkat ataani pineqartut ammaaqqinnissamut pilersaarusiornermi tunngavigineqartariaqartut:

-Misissuisarfiit pilersaarusiorlugit teknologiimillu ineriartortitsineq tunngavigalugu
angerlarsimasussaatinaanermi (karantæne) ullut amerlassusai ikilisinniarlugit.

-Ataatsimoorsinnaanermut killiliussat piffissami aaliangersimasumi annikillisikkiartuaarlugit, timersortartuutigut unamminernut naapeqqittalerniassammata. Kulturimut tunngasunik aaqqissuussinerit tassanilu aamma tusarnaartitsinerit ingerlateqqinneqartalernissaat periarfissillugu. Aammalu unnuisarfiit aaqqissuussisartullu allat ataatsimeersuarnernit annertuunik ingerlatseqqissinnaalernissaat periarfissillugit.

-Akiuussutissamik kapuinissamut pilersaarutit ersarissarlugit angalasinnaanermullu killilersuutit immikkut ittut periarfissalersillugit apeqqutaatillugu, piffimmi pineqartumi qassit akiuussutissamik kapitissimanersut. Taamaaliorneq takornarianik sullissisunut ilungersoreeqisunut iluaqutaassaaq.

-Akiuussutissamik kapuinissap sunniuteqarluartussap pilersaarusiornissaa, soorunami inuiaqatigiinni sanngiinnerusut peqqinnissaqarfimmilu sulisut pingaarnerutillugit, tamatumalu kingorna inuit, takornariaqarnermik suliallit imaluunniit allat inuussutissarsiornerup ingerlaqqinnissaanik suliaqartut.

-Akiuussutissamik kapitissimanermut uppernarsaatip eqqunnissaa, annertunerusumik periarfissiiniarluta soorlu kulturikkut aaqqissukkat, tusarnaartitsinerit ingerlatilernissaat aammali takornariaqarnermik sulialinnut- neriniartarfinnullu siuariartuutaasumik ineriartuutaasumillu.

-Qulakkiissavarput piginnaaneqarluartunik sulisoqarnissarput, inuiaqatigiit ingerlajuarnissaata qulakkeernissaanut aammalu tassunga atatillugu ersarissarlugu, tassunga atasumik inuiaqatigiinni pingaaruteqaartuni sullissisut kikkuuneri, taamaalilluta nalornissuteqaqqunata.

-Qulakkiissavarput innuttaasunut ammaaqqinnissamut suliniutinullu paasissutissanik
ilisimatitsiuarnissarput, tassani pineqarluni inernerisinnaasaata ilisimatitsissutiginissaa, paasiuminartumik ersarissarlugu, suna naatsorsuutigineqarsinnaanersoq aammalu qaqugu tamanna naatsorsuutigineqarsinnaanersoq. Tusagassiineq ataavartumik ingerlanneqarnissaa
qulakkeerneqartariaqarpoq inuaqatigiinnut toqqissisimanaqqullugu.

Anna Wangenheimip oqaatigaa, Covid-19-imut akiuiniarneq iluatsilluarsimavoq, ataatsimoorlutalu virusi annertuumik Nunatsinnut eqquttaaliorsimagipput.

- Minnerunngitsumiguna COVID-19-ip akiorniarneranut unammillernartut annertuut pissutigalugit, Demokraatit aaliangersimasut naalakkersuisoqatigiinnut maj 2020-mi ilanngutissallutik, politikkeri erseqqissaavoq.