Kommune Kujalleq
Wæverip missingersuut naammagisimaarpaa
Kommune Kujallermi isumaginninnermut aningaasat amerlanerusut atorneqassapput
Kommune Kujallermi aappaagu aningaasanut missingersuut akuersissutigineqarpoq. Kommunalbestyrelsimi ilaasortat tamarmiullutik aningaasaqarneq oqimaaqatigiittoq suliaraat.
- Nuannaarutigalugu nalunaarutigissavara kingumut ataatsimoorluta missingersuut akuersissutigigatsigu, taamaalillutalu kommunip 2017-mi aningaasarsiornikkut qanoq inissisimanissaa pillugu missingersuusiorparput, borgmesteri Jørgen Wæver Johansen (S) oqarpoq.
Atuaruk: Meeqqat illersuisuat Kujallermi pisut eqqasuutigai
Isumaginninnermut, arsaattarfinnut kajumissutsimullu suliaqartunut
Atugassat missingersuutigineqartut 547,5 millionit koruuniupput isertinneqartussallu 548,5 millionit koruuniunissaat naatsorsuutigineqarluni. Kommunimut akileraarut 28 procentiuinnassalluni.
Isumaginninnermut sulianut aningaasat amerleriassapput, taakku 6,5 procentimik siornamut naleqqiullugu amerleriaateqassagamik. Kajumissutsimik suliaqartut aamma amerlanernik aningaasaliiffigineqassapput, ineqarfiit oqummik eqqugaasimasut iluarsartuunneqassallutik aamma Narsami Qaqortumi Nanortalimmilu ivigaasaaqqanik arsaaffiliortoqassalluni.
Atuaruk: Kommune Kujalleq isumaginninnerup tungaatigut ikiortissarsiorpoq
Aningaasat nungunnaveersaarneqassapput
Kommunip karsia aningaasanik imaqartuaannassasoq aamma isumagineqassaaq. Tassa akiliisinnaassuseqarneq isumannaaqqaneqassalluni.
- Taamatuttaaq naammagisimaarpara 4. april 2017 qinersinerup kingorna kommunalbestyrelsinngortussamut patajaatsumik aningaasaqarnikkut inissisimasumik tunniussisinnaagatta, Jørgen Wæver Johansen (S) oqarpoq.