kiffartuussinissamik isumaqatigiissutit

Wæverip Knud Kristiansenimik saassussinini sakkortusivaa

Kommune Kujalliup borgmesteriata Naalakkersuisumit akissutisiani kamaatigai

Borgmester Jørgen Wæver Johansenip (S) allakkatigut ammasutigut attaveqarnermut Naalakkersuisoq Knud Kristiansen (A), oqaatsit sakkortuut atorlugit assuaraa.

Tatiginngilaa
Taanna misigisimavoq kommuni saaffiginnissumminut naammaginartumik akineqarsimanngitsoq.

– Naalakkersuisoq naalakkersuisoqarfialu, kiffartuussinissamik isumaqatigiissutinik isumaqatigiinniarnernik akisussaasuusut, tatigiuminaapput kommunimut kommunillu takunninnissamik kissaataanut taama naalagaaniartigisumik ataqqinninngitsigisumillu takutitsillutik akissuteqarmata, Jørgen Wæver Johansen (S) allakkamini allappoq, allakkallu Knud Kristiansenimut (A) Naalakkersuisullu siulittaasuannut Kim Kielsenimut (S) sammitinneqarput.

Isornartorsiuineq Knud Kristiansenip paasisinnaanngilaa
Jørgen Wæverip allagai Knud Kristiansenip (A) oktobarip 5-anni kommunimut, Kujataanilu akerliuniaqatigiinnut allagaanut akissutaapput.

– Oqaatiginngitsoorusunngilara tupigusuutigilaarakku isumaqatigiissutit nutaat taama isornartorsiorneqartigimmata, Knud Kristiansen (A) allappoq.

Wæver: Immakkut angallassiniarneq annertuvallaaqaaq
Isumaqatigiissutinilli takunnissinnaannginneq kisiat Jørgen Wæverip (S) kamaatiginngilaa. Pingaarnersaatillugu isumaqarpoq kiffartuussinissamik isumaqatigiissut Kujataanut ima ajortigisoq, atorunnaarsinneqartariaqarluni.

Pingaartumik naammaginngilaa angallassinerup ilarujussuata immakkut ingerlanniarneqarnera. Kiffartuussinissamik isumaqatigiissutit suliarineqarneranni kommunip tikkuarsimavaa angallassinermi helikopterit suli tunngaviunersaassasut.

– Tamatumani kommunip ersarissumik tikkuarpaa, kommunip kissaatigigaa timmisartuussineq 75 %-iussasoq, immakkullu angallassineq 25 %-iussasoq, Jørgen Wæver (S) allakkamini ammasuni allappoq.

Taanna isumaqarpoq pingaartumik Nanortalik nunaqarfillu ajorsartuussasut, angallassineq pingaartumik umiarsuarnik ingerlanneqassappat.

Kristiansen angallassinermik pitsaanerusumik neriorsuivoq
Knud Kristiansenili (A) allakkamini allappoq Diskoline ullumikkut angalanissamut periarfissanit akulikinnerusumik immakkut angallassillunilu timmisartuussisassasoq.

– Taamaasilluni aallartarnerit akuttoqatigiinnerulissapput, siunissamilu silap pissusiini ajornakusoornerusuni ullumikkuminngarnit akulikinnerusumik angalasoqarsinnaalissaq, taanna allakkamigut neriorsuivoq.

– Tassa Kujataani angallannermik pitsanngoriartitsinerujussuaq.

Ernumapput
Ersaripporli borgmester Jørgen Wæver (S) allakkanik qularunnaartinneqarsimanngitsoq.

– Ataatsimut isigalugu Naalakkersuisup 2016-imi oktobarip 5-anni ammasumik allagaasa, kommunip aammalu innuttaasa ingerlatsiviisalu nunap immikkoortuani tassani siunissami attaveqarnermut ernumassutereriigaat sakkortusiinnarpai, taanna akissutitut allakkamini allappoq.

Powered by Labrador CMS