Skip to main content

Wæverip kiffartuussinermut isumaqatigiissutinik suliaq aallaqqaataaneerusuppaa

- Maanna isumaqatigiissutaasut matussusersuinnarnissaat iluaqutaanngilaq, borgmesteri taama isumaqarpoq

Angallannermut kiffartuussinermut maanna isumaqatigiissutaasut sivitsorneqarlik, innuttaasut taamaalillutik ajorseriarnernut kalerriutigineqartunut eqqugaassanngillat. Aamma kommunip peqataatillugit, nutaamik suliarinnittussarsiornermik aallartitsisoqarli.

Borgmesteri Jørgen Wæver Johansen (S) Naalakkersuisunut ammasumik allagaqarnermini taama kaammattuivoq.

Akerleriissutaasut
Angallannermut isumaqatigiissutit nutaat, ilaasunik, nassiussanik allakkanillu isorliunerusunut imminut akilersinnaanngikkaluartunut qulakkeerinnittussat akerleriissutaangaatsiarput, akerliussutsimillu takutitsinernik kinguneqarlutik.

Isumaqatigiissutit nutaat ukiumit nutaamit atuutilissapput, imaatigullu angalanerusoqalissaaq, qulimiguulimmillu ilaneqartassallutik.

Ajorseriaatit peerneqarlik
Naalakkersuisooqatigiilersut Siumut, Inuit Ataqatigiit aamma Partii Naleraq, sisamanngornermi atuutilersut, ajorseriaataasussat pilersaarutaasut peerneqarnissaat siumut kalerriutigereerpaat.

Borgmesterip politikkikkut siunniunneqartut nersualaarpai, kisianni aamma sukkasuumik iliuuseqarnissamik piumasaqarpoq. Tamannalu maanna kiffartuussinermut isumaqatigiissutaasut sivitsorneqarnissaannut siunnersuuteqarnermik kinguneqartitsivoq, aammalu suliarinnittussarsiorneq nutaamik aallaqqaataaneerneqassasoq.

- Isumaqarpunga tutsuiginartumik tatiginartumillu iliuuserisinnaasatuarput tassaasoq nerriviup salinneqarnissaa aammalu suliap nutaamik aallarteqqinneqarnissaa, tassani qulakkeersimaneqassalluni kommunit toqqaannartumik sunniuteqartinneqarnissaat, taamaalilluta qulakkeerniarsinnaavarput innuttaasut, ilaasunik angallassinermi kiffartuussinermik isumaqatigiissuteqarluni angallannikkut atugassaqartinneqartut, pitsaasumik isumannaatsumik toqqissisimanartumillu sinaakkusiorfigineqarnissaat, allakkani ammasuni oqarpoq.

Matussusersuiniarnerit
- Isumaga malillugu piviusorsiornerussanngilaq aasap ingerlanani isumaqatigiissutigineqartussatut suliarineqarsimasup aammalu atuutilersinneqartussatut siunnerfigineqarsimasup akornutaasa matussusersorniarnerinnaatigut kommunimut naammaginartumik angusaqartoqarsinnaassasoq, Jørgen Wæver Johansen allakkami ilanngullu oqarpoq.

Sulissutisat arfineq-pingasut
Borgmesteri siunissami isumaqatiginninniarnernut tunngatillugu aamma arlalinnik sulissutissanik siunnersuuteqarpoq.

  • Neqeroortitsinissami piumasaqaataasussat ilusilersorneqassapput kommunit qanimut suleqatigalugit.
  • Kiffartuussinissamik isumaqatigiissutit nutaassat isumaqatigiinniutigineqarneri, kommunit qanimut suleqatigalugit ingerlanneqassapput.
  • Ilaasunik angallassiveqatigiit sillimaniarnikkut isumannaallisaanikkullu qaffasissumik inissisimanerminnik uppernarsaasinnaasut kisimik neqerooruteqartinneqassapput.
  • Ilaasut napparsimasut aammalu annertuumik innarluutillit isumannaatsumik angallanneqarsinnaanissaat isumannaarniarneqassaaq.
  • Meeqqanut utoqqarnukku akikillisaatit qulakkeerneqassapput.
  • Silamik pissuteqartumik imaluunniit angallassisut angallataasa teknikkikkut akornuteqarnerannik pissuteqartumik ilaasut ingerlaqqinneq sapilertut immikkut aningaasartortinneqannginnissaat qulakkeerneqassaaq.
  • Kujataanut immikkut tunngatillugu, kangerluit sikuusarneri aammalu sikorsuaqartarnera pissutigalugu silaannakkut angallassineq pingaarnerusutut inissisimassaaq imaatigullu angallassineq annikinnerusumik ingerlanneqassalluni, taamaattorli silaannakkut imaatigullu angallassisoqarsinnaanera tamarmik periarfissaassapput.
  • Kiffartuussinissamik isumaqatigiissutit isumaqatigiinniutigineqareerlutik inaarutaasumik ilusissaanni erseqqissumik avaqqutaarneqarsinnaanngitsumillu qulakkeerneqassaaq neqeroortitsisup isumaqatigiissummik kipisitsisinnaanera, matumani pineqarpat kiffartuussisup piumasaqaatinik isumaqatigiissutip iluaniittunik naammassinninnginnera, imaluunniit aamma illuatungeriit naatsorsuutigisaat annertussuserlu allanngortinneqarsinnaassallutik pissutsit malunnaatilimmik allanngornerisigut (assersuutigalugu mittarfimmik nutaamik atuutilersitsisoqarpat, imaluunniit kiffartuussisut allat suleqatigineqalerpata il.il.) 
Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER