ilinniartitaanerit
Wæver: Niuernermik Ilinniarfik tamaat Qaqortumut nuulli
Kommuneq Kujallermi borgmesteri Jørgen Wæver Johansen Siumumeersoq isumaqarpoq niuernermut attuumassutilimmik ilinniartitaanerit Qaqortumi katersorneqartariaqartut
Nuummi Niuernermik Ilinniarfimmi ilinniartut ikiliartortut ilinniarfiup taassuma Qaqortumi immikkoortortaani ilinniartut amerliartorput. Taavami Niuernermik Ilinniarfiup ingerlatai Qaqortumut eqiterniarlik, Kommune Kujallermi borgmesteri JørgenWæver Johansen oqarpoq.
Jørgen Wæver Johansenip innersuussutigaa ilinniarfinni allani kattussuunnerit. Soorlu Sanaartornermik Ilinniarfik, Aatsitassalerinermut ilinniarfik aamma Saviliminilerinermut Ilinniarfik kattutsinneqarsimapput. Aamma inunnik isumaginninnermut tunngasunik ilinniartitaanerit Perorsaanermik Ilinniarfimmi katersorneqarput.
Taamaammat Jørgen Wæver Johansenip siunnersuutigaa Niuernermik Ilinniarfimmi suleriuseq taanna atorneqassasoq Kujataani Ilinniarnertuunngorniarfimmut kattutereersoq ilinniartitsisut atorluarnissaat anguniarlugu.
- Kattussineq aamma Naalakkersuisut sanaartornermut aningaasaliissutinik suliffeqarfinnillu sinerissamut siammarterinissamik politikkiannik qineqqusaarnerminnilu neriorsuutaannik pissusissamisuuginnartumik piviusunngortitsinerussaaq, Jørgen Wæver Johansen oqarpoq.
Taamaattoq Niuernermut Ilinniartitaanerit kattunneqarpata ilinniartut tamarmik inissaqarnissaat unammilligassaalersinnaavoq.
- Niuernermik Ilinniarfiup ingerlataannik tamanik Qaqortumut eqiterinikkut ilinniartut inissaannik pinngitsoornani pisariaqartitsisoqalertussaammat Kommune tamatumani aaqqeeqataanissaminut piareersimassaaq, Jørgen Wæver Johansen oqarpoq.