Skip to main content

VVM pillugu nalunaarusiaq akerlerineqaqisoq Avatangiisinut Aqutsisoqarfimmit akuerineqartoq

Avatangiisinut sunniuteqaataasussat ilisimasalinnit ukiorpassuarni nalilersorneqarneranni arlalitsigut missingerneqartareersut, Greenland Mineralsip Kuannersuarni aatsitassarsiornissaq pillugu VVM pillugu nalaarusiaata imai tamakkiisutut Aatsitassanik Suliassaqarfinnut Avatangiisinut Aqutsisoqarfimmit akuerineqarsimapput.

TAKUUK sisamanngornermit nal. 09.00 ilanngutassiaq iluarsineqarpoq. Aatsitassanut Naalakkersuisoqarfimmit erseqqissaatigineqarsimavoq, VVM Naalakkersuisunit inaarutaasumik akuerineqarsimanngitsoq, nalunaarusialli imai Aatsitassanik Suliassaqarfinnut Aavatangiisinut Aqutsisoqarfimmit akuerineqarsimasut. 

Greenland Minerals LTD-p nittartagaani ullumi atuarneqarsinnaavoq, VVM pillugu nalunaarusiaq tamakkiisutut Aatsitassanik Suliassaqarfinnut Aavatangiisinut Aqutsisoqarfimmit akuerineqarsimassoq.

Nalunaarusiami allaaserineqarput, aatsitassanik qaqutigoortunik uranimillu saniatigut qaqitsisarluni piiaanissap avatangiisinut kinguneqaatissai.

Nalunaarusiamik akuersinerup malitsigisaanik Greenland Mineralsip aktiaataasa nalingi Australiap børsiani qaffangaasiarsimapput.

Tamanut tusarniaassutigineqarnissaa tullinnguuttoq

Aatsitassanik Suliassaqarfinnut Aavatangiisinut Aqutsisoqarfimmi pisortaagallartup Kell Svenningsenip Sermitsiaq.AG-mut uppernarsarpaa, aqutsisoqarfiup Greenland Mineralsimut septembarip 18-iani attaveqarsimanera.

- Aqutsisoqarfiup Greenland Mineralsimut nalunaarutigisimavaa, siunnersortitik Nationalt Center for Miljø og Energimeersut (DCE) Pinngortitaleriffimmeersullu peqatigalugit nalilersimallugu, Kuannersuarni suliniummut atatillugu VVM pillugu nalunaarusiassatut missingiutip kingulliup imarisai piumasaqaatinut naammassinnimmata, suliap tamanut tusarniaassutigalugu aallartinneqarnissaant Naalakkersuisut isummernissaat siunertaralugu Naalakkersuisunut saqqummiunneqarsinnaanngortoq, taanna allappoq.  

Taassuma ilisimatitsissutigaa, nalunaarusiami sammineqarsimasut annertoorujussuit Naalakkersuisut pineqartumik suliaqannginneranni nutserneqaqqaartussaasut, erseqqissaatigaalu tamanut tusarniaasoqareerpat, tusarniaanermilu akissutit ilanngunneqareerpata, siunnersortinik allanillu nalilersorneqareerpata aatsaat Naalakkersuisut VVM pillugu nalunaarusiamut inaarutaasumik isummertussaasut.

Akuersissuteqarneq pingaarutilipilussuaq

Greenland Minerals nittartakkamini allappoq, nalunaarusiamik nutserineq oktobarip qaammataani naammassineqassasoq naatsorsuutigineqartoq.

Greenland minerals LTD-mi pisortaanerup John Mairip nittartakkami oqaaseqarnermini erseqqissaatigaa, Aatsitassanik Suliassaqarfinnut Aavatangiisinut Aqutsisoqarfiup akuersissuteqarallarnera suliniummut pingaarutilipilussuusoq.

- VVM pillugu nalunaarusiap imai annertoorujussuupput suliarilluangaallutillu, tamatuma malitsigisaanik Kuannersuarni suliaqarnissaq aktiaatilinnit tatigineqarluinnalersimavoq. Tamanut tusarniaassutigineqarnissaa piiaanissamullu akuersissuteqartoqarneranut atatillugu isumannaagassat allat pilersaarusiorniarlugit Aatsitassanut Naalakkersuisoqarfik attavigissavarput, taanna allappoq.

Aktiat nalingi qaffarujussuartut

Akuersissummik tunniussiniarneq piffissami sivisuupilussuarmi ingerlanneqarsimasoq anguneqarmat, aktianik niuerfinni maluginiarneqarsimavoq.

Nittartakkami proactiveinvestors.com-imi atuarneqarsinnaavoq, Greenland Mineralsip aktiaatai ullumi 35,5 centimik qaffassimasut, tassa VVM pillugu nalunaarut saqqummiunneqarmat. Ippassaq niuerfiup matunerani aktiap naleqarsimaneranit 34 %-imik naleqarnerulersimalluni, ukiullu arfineq-marluk ingerlaneranni nalinga aatsaat taamak qaffasitsigaluni, tusagassiorfik allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER