VVM-imut missingersuut nutaaq ernumanartoqartinneqarpoq
Greenland Minerals Limitedip VVM-imut missingersuutaa tunniunneqaqqammersoq NGO-nit iluarineqarpianngilaq, tamakkua isumaqaramik nalunaarusiami siullermi ajornartorsiutit selskabip aaqqiissutissarsisimanngilluinnarai. Pingaartumik pujoralaat teqqartarnissaat tatsimilu Tasermi tailingsit qanoq iliuuseqarfiginiarneqarnerat ernumatitsipput.
Australiamiut aatsitassarsiornermik selskabiata Greenland Minerals Limitedip VVM-imut missingersuusiani iluarsaanneqarsimasoq kingulleq septembarimi Aatsitassarsiornermi Avatangiisinut Aqutsisoqarfimmut tunniuppaa, taassumalu avatangiisinut siunnersortit attuumassuteqanngitsut Pinngortitaleriffimmeersut Aarhus Universitetimilu Nationalt Center for Miljø og Energi-meersut suleqatigalugit missingersuut oqartussaasutut suliarileruttorpaat, Sermitsiaq allappoq.
NGO-lli arlallit, soorlu NOAH WWF-ilu kiisalu tusagassiorfiit soorlu KNR Sermitsiarlu missingersuumik takunnissinnaanermut akuerineqarsimapput. Arlalinnik takussutissaqarpoq suliniummi suli unammilligassaqartoq. Taamatut isumaqarput NOAH, Greenpeace nunatsinnilu avatangiisinik illersuiniaqatigiiffik Avataq.
– VVM-imut missingersuummi allassimavoq naliliussat qaangeqqusaanngitsut tamarmik ataallugit malinneqarsimasut. Pujoralannulli ajornartorsiut naammaginartumik aaqqinneqarsinnaarpasinngilaq. Ukiunut 37-inut isigaluni taava pujoralaat annertoorujussuit sumiiffinnut piiaaffiup eqqaaniittunut aniatinneqassapput, tassa Narsamut nunarsuarmullu kingornussarsiussamut Kujataanut, Avatap siulittaasua Mikkel Myrup oqarpoq.
Allaaserineqartoq Sermitsiami atuaruk. Aviisi uani pisiarineqarsinnaavoq: