Vollsmosemi kalaallit qasuersaartarfiat

Suliniuteqartut marluk, tassa Eva Martinsen aamma palasi ineriartortitsisoq Povl Götke, kalaallit Vollsmosemi najugaqartut kisiisa eqqarsaatiginngikkaluarlugit sammisassaqartitsiniaraangamik aaqqissuisuusarput. Aaqqussuussinerit nuannarineqangaarmata sumiiffinnit allaneersut aamma peqataasarput.

Kalaallit inuiattut ullorsiornerat siorna siullermeerlugu malunnartinneqarpoq. Puisip neqaa nerineqarluarpoq, kingornalu qittattoqarluni.

Aasaanerani aaqqissuineq

Juullimi naalagiartitsisoqarlunilu kingorna katerisimaartitsisoqarpoq. Inuit 60-it peqataapput. Sapaatit akunnerinilu makkunani aasaanerani meeqqanut sammisassaqartitsisoqarnissaanut aaqqissuussinerit ingerlanneqarput. Dansk Folkehjælp aningaasaliilluni tapiisuuvoq.

Neriuutigineqartut malillugit suliaq iluatsissappat, kalaallit meerartaannut afrikamiullu meerartaannut ilagiinni DRCongoneersunut, oqaluffimmi atorneqartumi naalagiartartunut, sammisassaqartitsisoqassaaq.

Sapaatip akunnerani 29-mi Vejen Idrætscenterimut angalasoqarnissaa takorloorneqarpoq, angalanermi angajoqqaat kajumissutsiminnik ikiuuttussatut peqataatinneqassallutik. Soqutiginnittunut Eva Martinsen attaveqartuuvoq. Soorunami Facebook atorlugu.

Vollsmose 9.000-it missaannik innuttaqarpoq, taakkunannga 80-it kalaaliullutik.

Unamminartoq toqqissisimanarpallaanngitsorlu

Eva Martinsen, ueqarpoq sisamanillu meeraqarluni. Sermitsiaq.AG-mit oqaloqateqarnermini isertuutinngilaa Vollsmosemi najugaqarneq unammillernartoqarlunilu ilaatigut toqqissisimanarpallaarneq ajortoq.

Vollsmose atugarliornerit najugassaattut politikerinit taaneqarsimavoq, tamannalu ajornartorsiutinik assigiinngitsunik malitseqarpoq.

Nutaamik eqqarsartoqartariaqarpoq

Qallunaat ilagiit oqaluffiat Vollsmosemi unammilligassaqartoq, Povl Götkep oqaatigaa.

- 1996-imi Vollsmosemi palaseqarfimmi 7.000-it missaat ilagiinnut ilaasortaapput. Ullumikkut ilaasortat 2.813-iinnaapput, Povl Götke oqarpoq nangillunilu.

- Taamaammat nutaamik eqqarsarluarnissaq pisariaqarpoq. Massakkut ingerlaannassappat ukiut qulit 15-illu missaat qaangiuppata Vollsmosemi oqaluffeqassagunanngilaq. Tamanna ajorluinnassaaq.

Kinguaariit pingasut

- Taamaammat nuannerluinnarpoq kalaallit oqaluffimmukartarmata, soorlu Kalaallit Nunaanni najukkaminni taamaaliortartut. Nammineerlunga nuannaartarpunga takugaangakku ilaqutariinni kinguaariit pingasuullutik ataatsikkut naalagiartut takugaangakkit. Eqqarsaqqissaarneq atorlugu naalagiartitsinerit maanna ingerlattalingajalerpagut, oqaluffiullu iluani inissititersimanerit aamma aaqqissagunarpagut. Oqartoqarnikuunngilarmi issiaviit pisatallu allat oqaluffiup iluani inissinneqarsimasut, oqaluffiup sananeqaqqaarneraniilli nikisinneqassanngitsut.

- Takorluugaraara kalaallit qajaanik nivinngaanissarput aamma tajorluugaraara kalaallit palasit uliguaannik peqalernissarput.

Inuit ilagerusutakka nassaarisimavakka

Povl Götkep kalaallit oqaluffiat nuannarilluinnarpaa isumaqarlunilu kalaallit ilageeqarnerat ilinniarfiulluarsinnaasoq.

- Kalaallit naalagiaraangata suna tamarmi nipaallunilu eqqissisimanartarpoq. Tussiutit arriitsunnguamik atorneqartarput, imminnullu isumassortoqartarluni.

- Kunngit pingasuni nuliama oqaluffiani, Thomas Kingos Kirkemi, kalaallit naalagiaqatigeqqaarakkit ima eqqarsarpunga: inuit ilagerusutakka nassaarivakka. (Eva Götke Thomas Kingos Kirkemi, kalaallit Odensemiittut naalagiarfigisartagaanni palasiuvoq, aaqq.)

Meeraanermi angerlarsimaffik

- Taama oqarninni una isumagaara, meeraaninni angerlarsimaffinni aamma taama misigisarsimagama.

- Takorloorsinnaavara kalaallit piffissamik atueriaasiat isumassarsiorfigisinnaagipput ilisisarnerpullu allanngortillugu. Assersuutigalugu ilisilinnginnermi akunneq ataaseq sioqqullugu oqaluffimmi naapittoqarluni, ilisereernerullu kingorna oqaluffimmeeqqaartarluni. Eqqissiivilluni tamanna ingerlanneqarsinnaavoq, tuaviortoqarani, allaallu maannakkutuulli naalagiarneq aallartiliinnartoq ilisineq naammassisariaqarani.

Povl Götke Vollsmosemi palasitut ineriartortitsisutut atorfimmi saniatigut Søbysøgårdip paarnaarussiviani aamma palasiuvoq.

Vollsmose

Vollsmosemi najugaqartut inuiannit assigiinngitsunit 83-ininngaanneersuupput. Somaliamiut palæstiinamiullu amerlanersaallutik. Kalaallillu 80-it amerlavallaanngillat. Vollsmose eqqaaneqartillugu nunami inuiaqatigiinnut ilanngutitaaniarnermut apeqqut eqqaaneqanngitsoorsinnaanngilaq. Tassungalu Povl Götke ersarilluinnartunik isumaliuteqarpoq.

- Inuit ataqqillugit naapittassavagut eqqaamallugulu tamatta inuinnaangatta assigiinngitsunik ajornartorsiuteqartarluta, minnerunngitsumillu eqqaamassavarput tarnip ajunngitsumik atugaqarnissaa pingaaruteqarmat maanilu oqaluffiup malunnaataasumik suliaqarsinnaanera pisariaqarmat.

- Suliniutigut pillugit ilagiit siunnersuisui qujanartumik tapersersuingaatsiarput, palasi ineriartortitsisoq, Povl Götke naggasiivoq.