VM: Nunatsinnit isiginnaariartussanut inissat aalajangersimasut 180-it TAAK-ip pissarsiarai
Arnat assammik arsartartut nunarsuaq tamakkerlugu Norgemi Stavangerimi pissartanngorniutilerpata, nunatsinnit isiginnaariartut issiaqatigiissinnaanissaannut inissat 180-it assammik arsartartut kattuffiannit qulakkeerneqarput.
Nunarput, Norgemut, Østrigimut aamma Koreamut Norgemi Stavangerimi novemberip naaneranit unammilerpat isiginnaariaqataanissat pilersaarutigaajuk? Taamaappat nunatsinnit angalasut allat unamminermi isiginnaariartut issiaqatiginissaanut periarfissaqarputit. TAAK-ip International Handball Federation, isumaqatiginiarfigereerlugu isiginnaartut inissaannik 180-inik qulakkeerinnippoq.
Inissat aalajangersimasut pisiarineqarsinnaanissaat maanna ammaanneqarpoq.
Nunatsinnit arnat nunanut allanut unammisartut 29. november, 1. december aamma 3. december unammissapput.
Nunarsuaq tamakkerlugu pissartanngorniunnerini unammiuaarnerit siulliit aallarnerlugit nunarput Norgemut 29. november unammeqqaartuussaaq.
Amerlanerit isiginnaariarsinnaasut
- Timersoqatigiit Assammik Arsartartut Kattuffiat sivisulaamik isissutissat
isumaqatigiinniutereerlugit matumuuna kalaallit isiginnaariartussat
ataatsimoorfigisinnaasaannik inissinnissaat piareerpoq. IHF piumasaqaataa
sinnerniaraluaratsigu, tassa issiaviit 180-it unamminerni ataasiakkaani, kisianni tamanna
iluatsinngitsoorpoq, TAAK allappoq.
Isissutissat 180-it siulliit nunguppata isiginnaartut issiavinni allani issianissamut periarfissaqarlutik isissutissanik aamma pisisinnaapput.
