VM-imut anngutinngitsooraluarlutik sungiusaasoq tulluusimaarpoq
Arnat nunanut allanut unammisartut USA-mi unammersuarnermi takutitsilluartut sungiusaasuat Anders Friis naliliivoq. Ajugaaniutivinnermi pikkorinnernut ajorsarsimallutik nassuerutigaa.
Assammik arsarluni nunanut allanut unammisartut arnartaat USA-mi unammersuaqataanerminni sølvinnapput. Unammersuarneq Chicagomi USA-mi ingerlanneqarpoq.
Naak ajugaaniutivinnermi 24-34-mik Puerto Ricomut ajorsaraluarlutik, Anders Friisip unammisartut unammersuaarnermi takutitaat tulluusimaarutigaa.
VM-imut anngitsooraluarluni tulluusimaarneq
- Soorunami ajugaaniutivinnermi ajorsarnerput ajuusaarutigaarput. Taamaattoq maanga killinnerput nuannaarutigaarput, Anders Friis Sermitsiaq.AG-mut oqarpoq.
Naak corona aporfiusinnaasaraluartoq angalasinnaanertik qujamasuutigaa. Nunat ilaat unammisartuutiminnik angalanissamut aaqqissuisinnaasimanngitsut, Nunatsinni kattuffiup unammisartunut angalanissamut tapersersuinera nuannaarutigaa.
Pitsaanerusunut ajorsarneq
VM-imut anngunniunnermi unammisartut ilikkagarpassuaqartut oqaatigaa.
- Siullerpaamik kalaallit ajugaaniutivinnermut anngupput. Aallannginnitsinni tamanna anguniagarinikuuarput siunnerfiginikuullugulu. Siornatigut nunanut allanut unammisartunut sungiusaasuusimasut Johannes Grothip aamma Jakob Andreasenip sulissutigisimasaat maanna sikkeralerput, tamanna unammersuarnermi takutinneqarpoq, oqarpoq.
Nunanut allanut unammisartut aamma sukataarsimasut oqaatigaa. Inuusuttut arlariit unammiartorngaarput, siunissami atorsinnaasaminnik misilittagaqalerlutik.
- Unammisartut unamminerni isumaqatigiissutitsinnik attassilluarput, tamannalu unammersuarnerni taamatut isumaqatigiissutit eqquutsinnissaanik unamminerat pisariaqarpoq. Oqarsinnaavungali uagutsinnit pitsaanerusunit ajorsarluta. Puerto Ricomiut misilittagartuujupput ukiorpassuarni unammeqatigiinnikuullutik. Tamanna peqqutaalluni uagutsinnut ajugaapput, Anders Friis oqaluttuarpoq.
Ajorsareernermi isorinnittut
Ajugaaniutivinnermi kalaallit arnartaat aamma pissangasimasut oqaatigaa, tassami unamminermi ajugaasut VM-imut annguttussaammata.
- Taamaattumik Facebookikkut unammisartunut isorinnillutik allattut atuarlugit ajuusaajallannarpoq. Unammisartut nersualaagassaapput. Soorunami Kalaallit Nunaannit tapersersorneqarnerput aamma malugaarput, tamanna qujamasuutigeqaarput.
VM-imut anngunniunnissamut tulliuttumut, ukiut marlut qaangiuppata ingerlanneqartussamut, Anders Friis qilanaalereerpoq.
- Maanna ineriartoqqissaagut, aamma VM-imut siunissami anngunnissarput neriuutigalugulu upperaara. Neriuppunga unammisartut arlallit nunani allani unammisartunngorumaartut, taamaasilluni ineriartorluartoqarsinnaammat, nunanut allanut unammisartunut sungiusaasoq oqarpoq.