VM-imut anngunniunnermi arnat assammik arsartartut uku unammissavaat
Assammik arsarnermi VM-imut anngunniunnermi nunat sorliit unammissanersut makitsissutigineqareerpoq. Nunanut allanut unammisartunut sungiusaasoq Johannes Groth unammisaqattaarnissanut qilanaarpoq
Assammik arsarluni nunanut allanut unammisartut arnartaat nunarsuarmi pissartanngorniunissamut anngunniunnermi Gruppe B-miittussatut makinneqarpoq. Unammisaqattaarnerit Mexicomi maajimi ingerlanneqassapput.
Kalaallit unammissavaat USA, Cuba aamma Canada. Gruppe A-mi Den Dominikanske Republik, Puerto Rico aamma Mexico unammissapput.
Puljeni angusarissaarnerit marluk semifinalimut anngutissapput.
Semifinalernissamut periarfissaqarluartoq
Nuannut allanut unammisartunut sungiusaasoq Johannes Groth unammisaqattaarnissanut qilanaarpoq:
- Kikkut unammissanerigut aalajmangiisuunikuunngilaq. Cuba minillugu unammisassagut sinneri ajorsarfigilaaginnarnikuuagut siornatigut. Periarfissaqarluarpugut, kisianni pitsaanerpaaffitsinniittariaqarpugut semifinalissagutta, Sermitsiaq.AG-mut oqarpoq.
Unammersuaarneq pingaaruteqarpoq
Anngunniunnermi pitsaanerit sisamat akornaniinnissaq suli anguniarneqartoq Johannes Grothip naqissuserpaa.
- Neriulluarpugut aamma anguniagarput anguniarlugu sukataassaagut. Unammisartugut ineriartorluarnikuupput. Unammersuaarneq qanorluunniit inerneqaraluarpat unammisartunut unammersuaarneq pingaaruteqassaaq, Johannes Groth oqarpoq.