VM-imut anngunniunnerit: Nunatta Canada unammeqqaassavaa

Assammik arsarluni VM-imut anngunniunnissamut unamminissamut pilersaarut naammassivoq. Nunatsinnit nunanut allanut unammisartut Canada unammeqqaassavaa. Pissanganarpoq unammisartut kikkut unammissanerigut, nunanut allanut unammisartunut sungiusaasoq oqarpoq.

Arnat assammik arsartartut nunanut allanut unammisartui VM-imut anngunniunnerit aallartippata unammisassaat siulliit tassaapput Canadameersut. Anngunniunnernut unamminissamut pilersaarutit inissimmata tamanna qularnarunnaarpoq.

Unammineq siulleq aallartissaaq ataasinngornermi 5. juni nal. 17.00, Cuba aamma Mexico unammissallutik. Unammineq naammassippat ammaanersiorneq unammisartunillu ilisarititsineq pissaaq. Tamassuma kingorna Kalaallit Nunaat Canadalu unammissapput, unammineq nal. 20.00 aallartissalluni.

Nunanut allanut unammisartunut sungiusaasup Anders Friisip erseqqissarpaa unammisassanut piareersarneq ajornakusoorsinnaasoq:

- Canadamiit unammisartut kikkut anngunniunnermi unammissanerigut eqqoriaruminaappoq. Canada kingullermik unammigatsigu, unammisartuisa inuusuttai unammivagut. Maanna naluarput taakku unammeqqissanerlugit, imaluunniit inersimasut unammissanerlugit. Taamaammat unammisassat nukittuffii eqqoriaruminaassinnaapput, Anders Friis oqarpoq.

Cuba ajugaasussatut ilimagineqartoq

Eqqoriaruminartinneqartorli tassaavoq Cuba assammik arsarluni VM-imut anngunnissaa.

Kalaallit Nunaata Cuba marlunngornermi 6. juni nal. 20.00 unammissavaa. Nunarpullu tassani qanoq inissisimajumaarnersoq, sungiusaasup pissanngatigilluinnarpaa.

- Cuba assammik arsarnermut pikkorilluinnartuuvoq, arnartaalu VM-imut anngunnissaat ilimagineqarluarpoq. Nunanut allanut unammisartutta taakkununnga unammilerunik qanoq inissikkumaarnissaat pissanganarluinnarpoq, Anders Friis oqarpoq.

Nunatta erinarsutaa saqqummiunneqangajalersoq

Timersoqatigiit Assammik Arsaertartut Kattuffiata, TAAK-ip tusagassiorfinnut nalunaaruteqarluni ilisimatitsissutigaa unamminissanut pilersaarutit nittartakkaminnut Facebookiminnullu ilingajalerlugit. Unamminissanut isiginnaassutissat billetsit pisiassaalerput, unamminerillu Inussivimmi 5.-11. juni ingerlanneqassallutik.

- Immikkorluinnaq ittumik erfalasorput nunarpullu pillugu sukataarutissaqarpugut. Nalunngilarput arnartagut pisinnaasartik tamaat atorlugu sukataassasut. Qanorluunniillu inerneqaraluarpat tulluusimaarutigerusuppagut, TAAK allappoq ilisimatitsissutigalugu arnat nunanut allanut unammisartunut erinarsuusiaq saqqummersinneqangajalersoq.

Cuba, Mexico, Canada aamma USA nunatsinnut unammiartussaapput. TAAK-illu neriuutigaa nunatsinnit isiginnaariat tikeraanut tikilluaqqusilluassasut, nuannersumillu misigititsissasut.

Timigissartut ajoqusernaveersaarlutillu

Unamminerit aallartinnissaannut ullut ikiliartuaartillugit unammisartut sungiusarput. Anders Friisip erseqqissarpaa nunatsinni pissartanngorniuttoqarnerani arnat unammisartut qanoq ineriartorsimatiginerat nalileruminaassimasoq. Unammisartulli ataatsimoortarneranni ineriartornerat ersarinnerulluinnartoq oqaatigaa:

- Unammisartut ataatsimooraangata ineriartorfiusimasut takujuminartinnerusarpakka. Maanna siuarsagassagut aalluppagut, unammisussallu pikkoriffigisatik aallullugit sungiusaleruttorput. Ajoqusernaveersaarnissaq pingaaruteqarluinnarpoq. Sungiusarneq ingerlalluarpoq, aamma pikkoriffiit ukkatarineranni, Anders Friis Sermitsiaq.AG-mut oqaluttuarpoq.

TAAK-ip neriuutigaa Inussivimmi, angerlarsimaffinni katersuuffinnilu illersuisussat amerlalluinnassasut.

Powered by Labrador CMS