VM-imut anngunniunneq: Unamminerit internetikkut isiginnaarneqarsinnaassapput
Suliffeqarfik Nuummeersoq, Takulaa Streaming, arnat assammik arsartartut VM-imut anngunniunnerat Nuummi ingerlanneqalerpat, internetikkut aallakaatitsisuussapput.
Arnat assammik arsarlutik nunanut allanut unammisartut aatsaavissuaq nunatsinniillutik VM-imut anngunniutissapput. Tamanna kisiartaalluni siullermeertuunngilaq. Unamminerimmi aallakaatinneqarneri siullermeerlutik internetikkuinnaq aamma ingerlanneqartussanngorput.
Timersornermi unamminerit anginerni KNR nalinginnaasumik aallakaatitsisaraluarpoq. Maannakkulli TV-kkut aallakaatinnissaat piviusunngulerpasinngilaq.
Internetikkut aallakaatinneqassasut
Unamminerit internetikkut toqqaannartumik aallakaatinneqassapput, nunatsinneersorlu suliffeqarfik suliamik tigusisuuvoq.
- Suliassaq uagutsinnut angisoorujussuuvoq, aatsaat taama annertutingisumik suliaqalerpugut. TAAK saaffiginnimmat akuersivugut, suliariumallugu, Anders Berthelsen Takulaa Streaming-imi piginneqataasoq, unamminernillu aallakaatitsinissamik suliaqartussanngortoq oqaluttuarpoq.
Unamminerit Youtubekkut isiginnaarneqarsinnaassapput, TAAK-illu nittartagaani aamma nassaarineqarsinnaassallutik. Nunat unammiartitaqartussat taamaasillutik aamma malinnaanissamut periarfissaqarput.
Takulaa Streaming nalinginnaasumik ataatsimiinnerni internet atorlugu attaveqartitsisarpoq, oqalugiarnerniillu aamma internetikkut toqqaannartumik streamerinermik ingerlataqartarluni.
Ineriartornissamut periarfissaq
Assammik arsarluni VM-imut anngunniunnerit sulianit nalinginnaanerusunit annertunerujussuusut, Takulaa Streamingimiit Anders Berthelsen aamma Pierre Minik Lynge oqaluttuarput.
- Aallakaatitsisarnermi piginnaasatta annertusarnissaannut periarfissaqalerpugut. Suliffeqarfipput aamma ineriartornissamut periarfissaqarlualerpoq, streamerillunimi aallakaatitsinissaq aatsaat taama annertutigisoq misilissavarput, Anders Berthelsen oqaluttuarpoq.
Taassuma erseqqissarpaa timersortulerinermi naliliisartut, aallakaatitsinermi oqaluttut timersortullu aamma oqaaseqartinneqarumaartut, soorlu TV-kkut aallakaatitsinerni taamaattoqartartoq.
- Nunatsinni aallakaatitassiornermik suliaqartut tapersersorsinnaagatsigit nuannaarutigeqaarput. Sinnattutik piviusunngortileraat nuannaarutigaarput. Unamminernik aallakaatitsilerpata malinnaaffiginissaat pissanganarpoq, TAAK-imi siulittaasoq Carsten Olsen oqarpoq.
Unamminerit Inussivimmi 5.-11. juni ingerlanneqassapput.