VM-imut anngunniunneq: Kalaallit USA-mut unammeqqaassapput
Assammik arsarnermi VM-imut anngunniunnermi unamminissat inissipput. Nunanut allanut unammisartup Minik Dahl Høeghip anngussinnaanissartik neriuutigaa.
Kalaallit angutit assammik arsarnermi nunanut allanut unammisartut nunarsuarmi pissartanngorniunnissamut anngunniunnermi USA, Cuba aamma Mexico unammissavaat.
Anngunniunneq Mexicomi ingerlanneqassaaq juunip 26-anit.
- Anngunnissamut periarfissaqarluarpugut, Minik Dahl Høegh Sermitsiaq.AG-mut oqarpoq.
Unammineq siulleq USA-mut unammissapput
Ukiut marluk matuma siorna VM-imut anngunniuttoqanngilaq, tassani USA IHF-imit VM-imut inissamik tunineqarluni. USA-mut unamminissaq Minik Dahl Høeghimit qilanaarineqarpoq.
- Unammisartui arlallit Europami unammisartuupput. Danmarkimi 1. divisionimi unammisartoqarpoq. Assammik arsartartut amerikarmiunik ilaqutalinnik katersinikuupput, taamaattumik arsartoqarput Frankrigimit, tyskinik, igitsinimeersunik, danskit svenskillu. Unamminissaat pissanganassaaq, soorunami ajugaaffigerusuppagut, oqarpoq.
Cuba Mexicolu
Cubamit unammisartut ilisimasaqarfigivallaanngilai.
- Taamaattoq nukittuujusarput unammiartoraangata. Sungiusarnerminni harpiks atugarivallaanngilaat, tamanna unamminerni teknikkikkut ajoqqutigisinnaasarpaat. Mexicomiut mikinerulaarput sukkanerullutilli. Taakkununnga ajugaasinnaanissarput qularinngilara, Minik Dahl Høegh oqarpoq.
Periarfissagissaarput
Kalaallit nunanut allanut unammisartui anngunniunnissamut piareersarluarsimasut oqarpoq.
- Illersuilluarsinnaavugut aamma målmandigippugut. Naak saassussinermi ukiuni siuliitut pitsaatiginngikkaluarluta piareersimalluarpugut. Neriuppunga anngussinnaassalluta, oqarpoq.
Anngunniunnermi nunat tamarmik imminnut unammeqqaassapput, unammersuaarnerullu naggataani inissinniuutissallutik. Anngunniunnermi nuna ataaseq VM-imut anngutissaaq. Sverigemi Polenimilu VM januaarimi ingerlanneqassaaq.
Kalaallit unamminissaat aana (Nunatta nalunaaqutaa malillugu):
- Sapaat 26. juni nal. 19.00: Kalaallit Nunaat - USA
- Ataasinngorneq 27. juni nal. 19.00: Kalaallit Nunaat - Cuba
- Marlunngorneq 28. juni nal. 21.00: Mexico - Kalaallit Nunaat
- Pingasunngorneq 29. juni: Unammisoqassanngilaq
Sisamanngorneq: 30. juni:
- nal.: 19.00: bronzinnanniunneq
- nal.; 21.00: ajugaaniutivinneq