VM-imi pissartanngortup siunissami takorluukkani saqqummiuppai

Ukaleq Slettemark nunarsuarmi sisorarnermi inuusuttuni sapaatiummat pissartanngortoq, nunarsuarmi sisorallaqqinnerpaanngornissaminik takorluugaqarpoq.

Kalaaleq 17-inik ukiulik sisorallammak, nunarsuarmi pissartatut imminut taasinnaanngorpoq.

Taamalli taasinnaanngoraluarluni, Ukaleq eqqissisimaaginnarnianngilaq. Nunarsuarmimi pissartanngortoq kalaaliusoq, ujakkaarnerup iluani siunissami takorluugaqarpoq anguniagaqarlunilu.

Siunissami qaninnerusumi

Inuusuttut nunarsuarmi pissartanngorniunneranni, Slovakiami ulluni makkunani ingerlanneqartumi, 10 kilumiiterisut isorartutigisumi ingerlaarnermi, aqqutaani sisamariarluni ooqattaasarfissartalimmi, Ukaleq Slettemark nunarsuarmi pissartanngorpoq. Sapaatiummat tamanna pivoq.

Unamminermi angusarissaarpoq, 10 kilumiiterisut isorartutigisoq minutsini 31-ni sekundinilu 49-ni ingerlaarfigigamiuk, ooqattaasarfissallu tamaasa eqqorlugit.

Unammillertaa qaninnerusoq minutsi ataaseq sekundillu 14-it ingerlareertut tulliulluni apissippoq.

Ukaleq Slettemark Norges Cuppimi taamaasilluni siuttuugallalerpoq.

- Norges Cuppimi ajugaanissara anguniarpara, VM-imi ajugaasoq Sermitsiaq.AG-mut oqaluttuarpoq.

Takorluukkami piviusunngortinnissaanut maanna periarfissaqarluarpoq. Ukaleq Slettemarkimi sapaatiummat nunarsuarmi pissartanngorami, Norges Cuppimi siuttuulerpoq.

Siunissaq ungasinnerusoq eqqarsaatigalugu

Norges Cuppimi ajugaagaluaruni ajugaanngikkaluaruniluunniit, sisoraatimi unitsinnissai eqqarsaatiginngilaa.

Ukaleq Slettemark Norges Topidræts Gymnasiummimi ukiut aappassaat atuarpoq, tassani ilinniarnertuunngorniaatigaluni sisorarnermik sungiusarsinnaalluni.

Sisorarnermik soqutigisaqarnera inuunerup sinnerani attatiinnarneqassagunarpoq, inersimasunngorunimi pitsaanerit ilaanniikkusuppoq.

- Nunarsuarmi ujakkaartartuni pitsaanerpaat ilaanniilernissara anguniagaraara, Ukaleq Slettemark Sermitsiaq.AG-mut oqaluttuarpoq.

Powered by Labrador CMS